ԵՐԵՎԱՆ, 16 հունիսի — Sputnik. Ֆեյսբուք սոցիալական ցանցում մեկնարկած նոր նախաձեռնությունն ուղղված է Կոստանդնուպոլսի Հայ առաքելական եկեղեցու պատրիարքարանի Ընդհանուր փոխանորդ Տեր Արամ Արքեպիսկոպոս Աթեշյանի այցին։
«Թույլ չենք տալու Արամ Աթեշյանին Հայաստան մտնել» միջոցառման կազմակերպիչները կարծում են, որ Մեծ Եղեռնի 100-րդ տարելիցին Հայաստանյայց Առաքելական Եկեղեցու կողմից սրբադասված 1,5 միլիոն անմեղ զոհերի հիշատակը օրեր առաջ հրապարակավ պղծած, Կ. Պոլսի հայոց պատրիարքի աթոռը բռնազավթած Արամ Աթեշյանը Հռոմի պապի՝ Հայաստան այցելության առիթն օգտագործելով ցանկանում է իր անցանկալի ներկայությամբ մեր երկիրն էլ պղծել։
«Երբ Բունդեսթագի թուրք պատգամավորները հորդորում են արգելել Էրդողանի մուտքը Գերմանիա, մենք ևս՝ որպես սրբերի շարքին դասված իր միլիոնավոր զոհերի հիշատակը հարգող հայ ազգի արժանապատիվ զավակներ, թույլ չենք տալու նրա Հայաստան մուտքը»,- նշված է միջոցառման կազմակերպիչների հրապարակած հայտարարության մեջ։
Նախաձեռնության մասնակիցներին առաջարկվում է 2016թ.-ի հունիսի 22-ին հանդիպել օդանավակայանում Աթեշյանի մուտքը Հայաստան թույլ չտալու համար։
Նշենք, որ Արամ Աթեշյանը նամակ էր գրել Թուրքիայի նախագահ Ռեջեփ Թայիփ Էրդողանին և քննադատել Գերմանիայի Բունդեսթագի՝ Հայոց ցեղասպանությունը դատապարտող բանաձևը։ Նրա նամակը մեծ աղմուկ էր բարձրացրել հայ հասարակության շրջանում։
