ԵՐԵՎԱՆ, 13 հունիսի — Sputnik. National Geographic ամսագրի առցանց տարբերակը զբոսաշրջիկներին առաջարկել է ուսումնասիրել ճանապարհորդության համար նախընտրելի երկրների ցանկը։ Առավել հետաքրքիր երկրների ցանկում է հայտնվել նաև Հայաստանը։
Լրագրող Տարա Իզաբելա Բարտոնի կազմած երկրների ցանկում Հայաստանն առաջին տեղում է։
«Քչերը գիտեն, որ Հայաստանը 301 թվականին քրիստոնեությունը պետական կրոն ընդունած առաջին երկիրն է աշխարհում։ Հին Հայաստանի եկեղեցիները տեղակայված են երկրի ողջ տարածքում, թաքնված են կանաչ ձորերում ու տեղակայված են լեռների լանջերին։ Դրանք աշխարհում ամենալավ պահպանված հին վանքերից են համարվում», — նշում է հոդվածագիրը։
Հեղինակի խոսքով` այսօր Հայաստանն անվտանգ ու ապահով երկիր է, բուռն զարգացում ունեցող զբոսաշրջային ենթակառուցվածքներով, որը հիմնականում կենտրոնացած է Bed & Breakfast տիպի ընտանեկան փոքրիկ տների շուրջ։
Զարգացած է նաև ագրոտուրիզմը, որն ուղղված է կուսական բնության սիրահարներին ներգրավելու համար։
Եկեղեցիներ
Քրիստոնեական եկեղեցիները զարդարող որմնանկարները մեծ մասամբ անհետացել են կամ ոչնչացվել, իսկ Գեղարդի քարակերտ առյուծներն ու Սիսիանի վանքի խաչքարերի միահյուսված զարդանախշերը պահպանվել են ու հնագույն քաղաքակրթություններից մեկի ճարտարապետության լավագույն նմուշներն են ներկայացնում։
Հետաքրքիր են նաև այն վայրերը, որտեղ հայկական եկեղեցիներ են կառուցվել։ Ծաղիկներով զարդարված ձորերում և գույնզգույն բլուրների վրա բազմաթիվ եկեղեցիներ են տեղակայված և ավելի մատչելի են, քան Վրաստանի լեռնային արահետների վրա կառուցված եկեղեցիները։ Հեղինակն օրինակ է բերում Երևանից քիչ հեռու գտնվող Գառնու հեթանոսական տաճարը։
Առողջարան
National Geographic-ի լրագրողը հատուկ ուշադրություն է հրավիրել Դիլիջանի վրա, որին «հայկական Շվեյցարիա» են կոչում։
Զբոսաշրջիկների մեծ մասը սահմանափակվում է Հայաստանի մայրաքաղաք այցելելով, սակայն Երևանից դուրս, հինգ ժամ ճանապարհ անցնելուց հետո կարելի է հասնել Գորիս, որը գտնվում է Հայաստանի հարավում, քարանձավների ու ժայռերի արանքում։ Հոդվածի հեղինակը վստահեցնում է, որ այստեղ այցելելուց հետո զգացողություններն ավելի քան տպավորիչ կլինեն։
Գյուղերի միջով ձգվող ոլորուն ճանապարհներն էլ կտանեն դեպի Խնձորեսկ։
Ավտոբուսով ևս մի քանի րոպե երթևեկելուց հետո էլ կհայտնվեք IX դարում կառուցված Տաթևի վանքում, որը ժամանակին հայկական մշակույթի և կրթության միջնադարյան կենտրոն է եղել։
Վանական համալիր կարելի է հասնել նաև աշխարհում ամենաերկար ճոպանուղու` «Տաթևերի» շնորհիվ։
National Geogpraphic-ի կազմած ցանկում են ընդգրկվել նաև Նիկարագուան, Նեպալը, Իրանը, Կոսովոն, Ուզբեկստանը, Ալբանիան, Արևելյան Թիմորը, Վրաստանն ու Թունիսը։
