ԵՐԵՎԱՆ, 10 հունիսի-Sputnik. Հայ ազգային կոնգրեսի խորհրդարանական խմբակցության առաջնորդ Լևոն Զուրաբյանը կոչ է արել արտահերթ նիստում վերանայել 2016թ.-ի պետական բյուջեն։ Նրա խոսքով` կառավարությունը պետք է գնա այդ քայլին` հաշվի առնելով երկրի առջև ծառացած մարտահրավերները, մասնավորապես, ապրիլյան պատերազմից հետո ստեղծված իրավիճակը։
«Կարծում եմ, որ կան կետեր, որոնք պետք է փոխել, ես առաջարկում եմ վերանայել 2016թ.-ի բյուջեն` հաշվի առնելով Հայաստանի առջև ծառացած մարտահրավերները»,- ասաց Զուրաբյանը։
Նա, որպես օրինակ, նշեց, որ 2015թ.-ի պետբյուջեի ծախսերն աճել են 109 միլիարդով` ընդգծելով, որ իրենք դեմ չէին լինի այդ ծախսերին, եթե դրանք ուղղվեին տնտեսության ակտիվացմանը։
Զուրաբյանի խոսքով` Հայաստանի վարչապետը կառավարական ժամի ընթացքում խորհրդարանում ասել է, որ ընդունում է քննադատությունը, սակայն հայտարարել է, որ խորհրդարանը հաստատել է այդ ծախսերը։
«Եթե նրանք ընդունում են քննադատությունը, ապա թող արտահերթ նիստում վերանայեն 2016թ.-ի բյուջեն, որպեսզի որոշեն առաջնահերթությունները»,- ասաց Զուրաբյանը։
Նման քննարկում անցկացնելու օգտին հանդես է եկել նաև «Բարգավաճ Հայաստան» խմբակցության ներկայացուցիչ Միքայել Մելքումյանը։ Նրա խոսքով` խոշոր ռազմարդյունաբերական ձեռնարկությունները պետք է մտնեն ՊՆ-ի տնօրինության տակ և ազատվեն հարկերից։
Իր հերթին ՀՀԿ խմբակցության ղեկավար Վահրամ Բաղդասարյանը նշեց, որ եթե անհրաժեշտություն լինի, ապա կառավարությունը հանդես կգա նման առաջարկով։
«Ես ինքս առայժմ նման անհրաժեշտություն չեմ տեսնում»,- ասաց նա։
Հայաստանի 2016 պետբյուջեում ծախսերը ծրագրված են 1 տրիլիոն 373,7 միլիարդ դրամի չափով, իսկ եկամուտները` 1 տրիլիոն 183 միլիարդ դրամ` 197 մլրդ. դրամի կամ ՀՆԱ 3,5% պակասուրդի դեպքում։ Հայաստանի պետբյուջեի համաձայն` 2016 թ.-ին ՀՆԱ աճը նախատեսված է 2,2%-ի չափով։
