ԵՐԵՎԱՆ, 8 հունիսի — Sputnik. Կառավարությունը քայլ առ քայլ է իրականացնելու ծախսերի արդյունավետությունը, ԱԺ-ում կառավարության հարցուպատասխանի ժամանակ ասաց ՀՀ վարչապետ Հովիկ Աբրահամյանը:
«Բոլորը գիտեն, որ սկսել է գործընթաց, մենք ավելի շուտ պետք է սկսեինք այս տեմպով, բաց շատ քաղաքական գործիչներ կան, որ իրոք ցանկանում են չհավատալ, բայց մեր գործունեությամբ մենք փորձելու ենք համոզել, որ մեր աշխատանքը բերելու է ծախսերի արդյունավետության: Ծրագիրը, որ մենք դրել ենք մեր առջև, քայլ առ քայլ իրականացնելու ենք: Պարզապես չպետք է ակնկալել, որ մեկ հարվածով բոլոր հարցրերը կլուծվեն, ոչ, դրա համար ժամանակ է պետք, ռեսուրս: Բայց մենք հետևողական, դանդաղ շտապելով գնում ենք առաջ»,- ասաց Աբրահամյանը:
Վարչապետի խոսքով` ծախսերի կրճատումը, որը մեկնարկել էր ծառայողական մեքենաների կրճատմամբ, շարունակվում է:
«Երեկ էկոնոմիկայի փոխնախարարի հաստիքն է կրճատվել, վաղը կրճատվելու են ևս երեք-չորս փոխնախարարներ»,- ասաց վարչապետը:
Վարչապետի հունիսի 7-ի որոշման համաձայն` Սերգեյ Ավետիսյանն ազատվել է էկոնոմիկայի նախարարի տեղակալի պաշտոնից և կառավարությանն առընթեր քաղաքացիական ավիացիայի գլխավոր վարչության պետ նշանակվել։
