ՀՀ կառավարության մայիսի 19-ին նիստում կառավարության աշխատակազմի ղեկավար-նախարար Դավիթ Հարությունյանը զեկուցեց, որ ի կատարումն վարչապետի հանձնարարականի` որոշվել է բյուջետային ծախսերի կրճատման միայն առաջին փուլում կրճատել գործադիրի հաշվեկշռում հաշվառված 797 ավտոմեքենա։
Այս հայտարարությունից հետո հասարակությունը շունչը պահած սպասում էր, թե որ չինովնիկն իր ծառայողական որ ավտոմեքենայից է հրաժարվելու։ Եվ ահա կառավարության կայքում հայտնվեց սպասված լուրը, կամ ավելի ճիշտ` հունիսի 9-ի նիստի օրակարգը։ Դրա 3 հարցերը վերաբերում են հենց պետական մարմիններին ամրացված ավտոմեքենաների կրճատմանը։
Պարզվում է` կառավարության աշխատակազմը պատրաստ է հրաժարվել իր 15 ավտոմեքենայից, առողջապահության նախարարությունը` 26, Ազգային ժողովը` 24։ Իրենց 56 ավտոմեքենայից հրաժարվելու` հայ չինովնիկների ասպետական քայլը, թերևս, կարող էր դրական ընկալվել, եթե կառավարության համապատասխան որոշումների նախագծերում հրապարակված չլիներ նույն այդ ավտոմեքենաների ցանկը։
Կառավարության աշխատակազմն, օրինակ, պատրաստակամություն է հայտնել հրաժարվել 6 «ԳԱԶ-3110», 4 «ԳԱԶ-3102», 1 «ՎԱԶ-21099», 1 «ՎԱԶ-2115» ավտոմեքենայից, 3 ավտոկցորդից ու էլեկտրաամբարձիչից։ Մնացած 3 ավտոմեքենաներից մեկը 1995թ-ին արտադրված «Մերսեդես 124» է, մեկը 1982թ-ին արտադրված «Մերսեդես-Բենց 500», երրորդը` 2002թ-ին արտադրված «Տոյոտա Լենդ Կրաուզեր»։
Համեմատության համար նշենք, որ ՀՀ կառավարության կայքում հրապարակված պաշտոնական ցանկի համաձայն` կառավարության աշխատակազմին սպասարկող ծառայողական ավտոմեքենաներից ամենահինը ՀՀ վարչապետի օգնականի «Ֆոլկսվագեն Պասսատ 025»-ն է, իսկ պահեստային 2 ավտոմեքենաները 2012թ-ի արտադրության «Հոնդա CR-V» մակնիշի են։
Ինչ վերաբերում է առողջապահության նախարարության` կրճատման ենթակա ավտոմեքենաներին, դրանցից ամենաթանկը 2003թ-ին արտադրված «ԱՈՒԴԻ»-ն է և 2007թ-ին արտադրված երկու «Շևրոլե Նիվա»-ները։ Մյուս ավտոմեքենաները 1993-1998թթ. արտադրված «ԳԱԶ 31»-երն են, «ՎԱԶ 21»-երը և 2005-ին արտադրված «Լադա Նիվա»-ները։
Ի դեպ` որոշման նախագծում առողջապահության նախարարությունը խոստովանել է, որ ներկայացված 26 ծառայողական ավտոմեքենաներից 17-ն արդեն 5-10 տարի չի շահագործվում` անսարքության, 9-ը` չափազանց հին լինելու պատճառով։
ԱԺ-ում, ի դեպ, ավելի հեռուն են գնացել. ծախսերի կրճատման ու օպտիմալացման անվան տակ որոշել են ազատվել, թերևս, ԽՍՀՄ տարիներից ԱԺ ավտոպարկում մնացած ու ավելորդ տեղ զբաղեցնող ավտոմեքենաներից։
Օպտիմալացվող 24 ավտոմեքենաներից մեկը 1983թ-ին արտադրված «ՈՒԱԶ» է, մեկը 1986թ-ին արտադրված «ԶԻԼ», մնացածը` 1987-2003թթ-ին արտադրված «ԳԱԶ-31»-եր ու «ԳԱԶ-24»-եր, մեկ հատ 2003թ-ին արտադրված «ՊԵԺՈ —406» և մեկ «ՄԻՑՈՒԲԻՇԻ Գալանտ»` արտադրված 1998թ-ին։
Ի դեպ, հետաքրքրական է, որ կառավարությունը ոչ միայն որոշել է ազատվել ավտոտնակներում մնացած ավելորդ ավտոմեքենաներից, այլև դրանք վաճառքի հանել։ Կրճատված ավտոմեքենաները նախ կհանձնվեն պետգույքի կառավարման վարչությանը, ապա` կօտարվեն։
Կառավարությունը կազատվի իրեն խանգարող հնոտիներից, հասարակությունը կհամոզվի, որ պետական պաշտոնյաները պատրաստ են հանուն իրեն հրաժարվել իրենց «ճոխ» ծառայողական ավտոմեքենաներից` ինչպես և խոստացել էին, իսկ տարիներ շարունակ ավտոտնակներում մնացած ու ժանգոտվող ավտոմեքենաներն էլ վերջապես նոր տերեր կունենան։
Եվ բոլորը գոհ կլինեն։ Մոտավորապես` ինչպես միշտ։
