ԵՐԵՎԱՆ, 8 հունիսի — Sputnik. Աբխազիայում անցկացված առաջնությունը լի էր անակնկալներով։ Ֆուտբոլասերներին առաջին հերթին ապշեցրեց Արևմտյան Հայաստանի և Չագոսի կղզիների թիմի խաղային ջախջախիչ հաշիվը` 12:0։
Երկրորդ անակնկալն այն էր, որ հայ ֆուտբոլիստները բարձրացրին Արևմտյան Հայաստանի դրոշը։
Եվ երրորդը` առաջնության ժամանակ Արևմտյան Հայաստանի հավաքականի և Պենջաբի միջև բախում եղավ։ Կռիվը սկսվեց հենց ֆուտբոլի դաշտում, երբ ֆուտբոլիստներից մեկը հարվածեց «Արարատ» երևանյան ակումբի պաշտպան Րաֆֆի Կայային։
Վեճին միացան նաև երկրպագուները, ինչպես նաև ոստիկանները, որոնք, Արևմտյան Հայաստանի հավաքականի ֆուտբոլիստների խոսքով, ագրեսիա դրսևորեցին իրենց նկատմամբ։ Սակայն ֆուտբոլիստներն ու Արևմտյան Հայաստանի հավաքականի գլխավոր մարզիչի օգնական Ալբերտ Աճեմյանը նշում են նաև, որ «սպորտում միշտ լինում են նման միջադեպեր»։
Լրագրողների հետ զրույցում Աճեմյանը նշեց, որ թիմի նպատակն առաջին հերթին Արևմտյան Հայաստանի գոյության մասին աշխարհին պատմելն էր։
«Առաջին իսկ օրից Աբխազիայի և Արևմտյան Հայաստանի հավաքականները ֆավորիտների շարքում էին։ Մենք մեր առաջ նպատակ էինք դրել պատվով խաղալ, քանի որ մենք ներկայացնում էինք Արևմտյան Հայաստանն ու հայ ժողովրդին», — ասաց Աճեմյանը։
Նա ավելացրեց, որ Արևմտյան Հայաստանի թիմը վեցերորդ տեղը զբաղեցրեց, ինչը սպորտի տեսանկյունից այդքան էլ լավ արդյունք չէ։ Սակայն դա վատ արդյունք չէր հենց թիմի համար, քանի որ առաջին անգամ էր ելույթ ունենում առաջնությունում։
Ֆուտբոլիստները միմյանց չէին ճանաչում, միասին չէին մարզվել, սակայն մարզադաշտում կարողացել էին «լեզու գտնել» մի պարզ պատճառով` նրանց միավորել էր այն միտքը, որը ելույթ են ունենում Արևմտյան Հայաստանի դրոշի ներքո։
Աճեմյանը կարծում է, որ նոր հավաքականի ապագան կապված է Արևմտյան Հայաստանի տարբեր կառույցների հետ։ Նրա խոսքով` եթե ֆինանսական հարցերը լուծվեն, «այս թիմը մեծ ապագա կունենա»։
Գլխավոր մարզչի օգնականի խոսքով` առաջին քայլն արված է, Աբխազիայում մարզիկները հանդես եկան Արևմտյան Հայաստանի դրոշի ներքո, և նրանց ոչ թե Հայաստանի հավաքական էին ընկալում, այլ` հենց Արևմտյան Հայաստանի։
Արևմտյան Հայաստանի հավաքականը Պենջաբի հավաքականի հետ խաղն ավարտեց 2:3 հաշվով, իսկ Լապլանդիայի ազգային հավաքականի հետ խաղը` 0:3 հաշվով։
Արևմտյան Հայաստանի հավաքականի կազմն ամբողջական է դարձել մայիսի 27-ին` ընդգրկելով ինչպես Հայաստանի «Արարատ» ակումբի վեց ֆուտբոլիստների, այնպես էլ աշխարհի տարբեր երկրների ծագումով հայ ֆուտբոլիստների։
