Նա ծաղիկներ դրեց անմահ զոհերի հիշատակը հավերժացնող կոթողի մոտ, այնուհետև գրառում կատարեց Հայոց ցեղասպանության թանգարան-ինստիտուտի տպավորությունների մատյանում։ Ավանդույթի համաձայն` Միլոշ Զեմանը նաև ծառ տնկեց Հիշատակի ծառուղում։
Թանգարան-ինստիտուտի տնօրեն Հայկ Դեմոյանը Չեխիայի նախագահին հանձնեց Ֆրանց Վերֆելի անվան ոսկե հուշամեդալ։ Նախագահը ռուսերեն նշեց, որ մինչև օրս կարդացել է Ֆրանց Վերֆել ու Ֆրանց Կաֆկա. տեսել է Կաֆկայի լուսանկարներից, բայց Վերֆելի և ոչ մի լուսանկարի չի հանդիպել։ «Դա, իհարկե, իմ սխալն է։ Դուք համալրեցիք իմ գիտելիքները»,- ասաց նախագահը։
Նշենք, որ Չեխիայի նախագահը հունիսի 07-09-ը պետական այցով Հայաստանում է` նախագահ Սերժ Սարգսյանի հրավերով։ Այցի շրջանակներում նախատեսված են Չեխիայի նախագահի հանդիպումները ՀՀ բարձրագույն ղեկավարության՝ նախագահ Սերժ Սարգսյանի, Ազգային ժողովի նախագահ Գալուստ Սահակյանի, վարչապետ Հովիկ Աբրահամյանի հետ:
ՀՀ նախագահի նստավայրում հայ-չեխական բարձր մակարդակի բանակցությունների ավարտին նախատեսվում է փաստաթղթերի ստորագրման արարողություն:
Երևանում Հայաստանի և Չեխիայի նախագահները ներկա կգտնվեն հայ-չեխական գործարար համաժողովի բացման արարողությանը:
