ԵՐԵՎԱՆ, 6 հունիսի — Sputnik, Լաուրա Սարգսյան. Հայկական The Birds band խումբը Ադրբեջանի և Վրաստանի մասնակիցների հետ Շարժման թատրոնում ելույթ կունենա Kavkaz Jazz փառատոնի երկրորդ օրը։
Փառատոնն ամեն տարի նոր անուններ է բացահայտում ջազի աշխարհում։ Անցկացվում է 2010 թվականից, փառատոնի հիմնադիրն է «Art Bridge» կազմակերպությունը` Ելենա Մեչիտովայի ղեկավարությամբ, և անցկացվում է Թբիլիսիի քաղաքապետարանի ու Վրաստանի մշակույթի և հուշարձանների պաշտպանության նախարարության հովանու ներքո։
«Այս փառատոնը Վրաստանում անցկացվող միակ ոչ առևտրային ջազ փառատոներից է, որն իր մեջ կրթական տարր է պարունակում։ Նպատակը Հարավային Կովկասի ջազ կատարողների միջև առկա մշակութային երկխոսությունը զարգացնելն է», — Sputnik Արմենիայի թղթակցի հետ զրույցում ասաց փառատոնի PR մենեջեր Նինո Ցիտլանաձեն։
Նրա խոսքով` փառատոնը յոթ տարվա ընթացքում մի շարք փոփոխությունների է ենթարկվել` ամրապնդել է հիմքը, դարձել է ճանաչելի և պահանջված։ Այս տարի փառատոնն ընդլայնել է իր աշխարհագրությունը և, բացի Հայաստանից, Վրաստանից և Ադրբեջանից, միջոցառմանն են միացել նաև Իրանն ու Թուրքիան ներկայացնող խմբերը։
Փառատոնը ձևավորվել է որպես էթնո-ջազային միջոցառում, քանի որ կազմակերպիչները հիմնական շեշտը դրել են «էթնիկ» և «ֆոլկ» երաժշտությունների վրա։ Այստեղից էլ առաջացել է անվանումը` «Կովկաս ջազ փառատոն»։
«Հիմնական կատարողները հայ, ադրբեջանցի և վրացի խմբերն են, քանի որ յուրաքանչյուրն իր ուրույն և հետաքրքիր ջազ դպրոցն ունի` ոչ պակաս հետաքրքիր անցյալով և ներկայով», — ասաց Ցիտլանաձեն։
Նրա խոսքով` կազմակերպիչների համար կարևոր է այն, որ վրացական մեկ բեմում հանդես են գալիս Երևանից և Բաքվից ժամանած մասնակիցները։
Այս տարի փառատոնի բացումը տեղի կունենա Թբիլիսիի Կոնսերվատորիայի Մեծ դահլիճում, իսկ գալա-համերգը` Ախալցխայի Ռաբաթ ամրոցում։
Գալա-համերգին կմասնակցեն Իրանի և Վրաստանի բենդերը։ Հայաստանից ելույթ կունենա «Միքայել Ոսկանյան & ընկերներ» խումբը։
«Միքայել Ոսկանյանն իր ընկերների հետ արդեն երեք անգամ մասնակցել է փառատոնին, և վրացի հանդիսատեսը սիրել է նրանց, այդ պատճառով մենք որոշեցինք կրկին այդ հաճույքը պատճառել ունկնդիրներին», — նշեց Նինոն։
Հունիսի 1-14-ը Վրաստանում անցկացվող փառատոնի շրջանակում մեկնարկել է երկշաբաթյա կրթական ծրագիր` Լուիսվիլի, Կենտուկիի համալսարաններին կից գործող Ջեյմի Էբերսոլդի անվան ջազի դպրոցի և Թբիլիսիի պետական կոնսերվատորիայի հետ համագործակցությամբ։
Ծրագրի շրջանակում նախատեսված է նաև Թբիլիսիի պետական կոնսերվատորիայում հունիսի 9-ին ավանդական կլոր սեղան անցկացնել։ Հայաստանից կլոր սեղանին կմասնակցի լրագրող, ջազային լրագրողների ասոցիացիայի անդամ Արմեն Մանուկյանը։
Kavkaz Jazz փառատոնին ավելի քան 60 երաժիշտ է մասնակցում։
