ԵՐԵՎԱՆ, 6 հունիսի-Sputnik. Նախօրեին` ժամը 18.43-ին տեղեկություն է ստացվել, որ Վանաձոր-Դիլիջան ավտոճանապարհին՝ Շահումյան գյուղի մոտակայքում, տեղի է ունեցել ՃՏՊ. անհրաժեշտ է փրկարարների օգնությունը, հաղորդում է ԱԻՆ մամուլի ծառայությունը:
Դեպքի վայր է մեկնել մեկ մարտական հաշվարկ:
Պարզվել է, որ Մ-8 միջպետական ավտոճանապարհի Վանաձոր-Դիլիջան հատվածի 6-րդ կմ-ին «BMW-318» մակնիշի 340 NO 092 պետհամարանիշի ավտոմեքենան դուրս է եկել ճանապարհի երթևեկելի հատվածից և մոտ 200 մ գլորվել մոտակա ձորակը:
Փրկարարներն ավտոմեքենայից դուրս են բերել Ա. Մ.-ին (1984թ. ծնված), Ա. Խ.-ին (1986թ. ծնված) և մոտեցրել շտապօգնության ավտոմեքենային: Վերջիններս հոսպիտալացվել են Վանաձորի ԲԿ, որտեղ բժիշկները տուժած Ա. Խ.-ի առողջական վիճակը գնահատել են միջին ծանրության, իսկ Ա. Մ.-ինը՝ ծանր:
Ինչպես հայտնում է shamshyan-ը, մեքենայի վարորդ Ա․Մկրտչյանը ծառայում է ՀՀ ՊՆ զորամասերից մեկի գումարտակի շտաբի պետ, կոչումով մայոր է, իսկ Ա․ Խաչատրյանը նույն զորամասում դասակի հրամանատար է, կոչումով` ավագ լեյտենանտ։ Փաստի առթիվ Հայաստանի քննչական կոմիտեի Լոռու մարզային քննչական վարչությունում նյութեր են նախապատրաստվում:
