ԵՐԵՎԱՆ, 6 հունիսի-Sputnik. Մոսկվայում բացվել է «Լրագրության նոր դարաշրջան. հրաժեշտ մեյնսթրիմին» միջազգային մեդիաֆորումը` նվիրված լեգենդար Սովինֆորմբյուրոյի 75-ամյակին։ Ֆորումին մասնակցում են մեդիափորձագետներ աշխարհի 30 երկրից, այդ թվում` ԱՄՆ-ից, Մեծ Բրիտանիայից, Ֆրանսիայից, Հնդկաստանից, Չինաստանից, Հայաստանից, Եգիպտոսից, Ադրբեջանից և ԱՄԷ-ից։
Առաջին օրը սկսվել է «Պոստ-մեյնսթրիմի դարաշրջանի լրագրողը» նիստով, որի շրջանակում ռուս և արտասահմանցի փորձագետները կվերլուծեն մեդիաշուկայի միտումները, կքննարկեն այսպես կոչված «պոստ-մեյնսթրիմի» դարաշրջանը, կփորձեն պարզել դրա զարգացման օրինաչափությունները։
Առաջին օրը ֆորումի հարթակում ելույթ կունենան «Ռոսսիա սեգոդնյա» ՄԼԳ-ի գլխավոր տնօրեն Դմիտրի Կիսելյովը (Ռուսաստան), ՌԴ կապի և զանգվածային հաղորդակցությունների նախարարի տեղակալ Ալեքսեյ Վոլինը (Ռուսաստան), Al Mayadeen TV մեդիախմբի տնօրենների խորհրդի նախագահ Բեն Ջիդոուն (Լիբանան) և ոլորտի այլ մասնագետներ։
Սպասվում է, որ համաժողովի ընթացքում կստորագրվեն մի շարք համաձայնագրեր առաջատար միջազգային ԶԼՄ-ների միջև համագործակցության մասին
Անցկացնելով ոլորտային ֆորում` կազմակերպիչները պարզ և միաժամանակ բարդ նպատակ ունեն` նախանշել և քննարկել գործընթացները, որոնք տեղի են ունենում ողջ աշխարհի ժամանակակից ԶԼՄ-ներում, գտնել ընդհանուր միտումները և հասկանալ տարբերությունները։ Հարցերը, որոնց պատասխանները կփորձեն գտնել մեդիա ոլորտի փորձագետները, բնորոշ են լրագրության համար ինչպես Ռուսաստանում, այնպես էլ արտասահմանում։
«Ռոսսիա սեգոդնյա» միջազգային լրատվական գործակալությունը միջազգային մեդիախումբ է, որի առաքելությունն աշխարհում տեղի ունեցող իրադարձություններն օպերատիվ, հավասարակշռված և օբյեկտիվ լուսաբանելն է, լսարանին առանցքային դեպքերի շուրջ տարբեր տեսակետներ ներկայացնելը։ «Ռոսսիա սեգոդնյա» ՄԼԳ- ն ներկայացնում է մի շարք տեղեկատվական գործակալություններ` ՌԻԱ Նովոստի, Ռ-Սպորտ, ՌԻԱ Նեդվիժիմոստ, Փրայմ, ՌԻԱ Ռեյտինգ, ԻնոՍՄԻ։
