ԵՐԵՎԱՆ, 3 հունիսի — Sputnik. ՀՀ ԱԺ պատգամավոր Խաչատուր Քոքոբելյանը Եվրասիական տնտեսական միությանը Հայաստանի Հանրապետության անդամակցության դադարեցման գործընթաց սկսելու մասին նախագիծ էր ներկայացրել ԱԺ, որը հետաձգվեց մեկ տարով։
Նախագծի հեղինակները համարում են, որ ԵՏՄ-ին անդամակցելու մեկ տարվա ընթացքում չեն իրագործվել նախատեսված քայլերը։
Ըստ Քոքոբելյանի՝ այս միությանը կողմ արտահայտվողները խոսում էին այն մասին, որ ԵՏՄ անդամակցությունը Հայաստանի անվտանգության բաղադրիչը կմեծացնի: Այնինչ, այսօրվա պայմաններում հնարավոր չէ ասել, որ այդ անդամակցության շնորհիվ ավելացավ Հայաստանի անվտանգության բաղադրիչը: Քառօրյա պատերազմն, ըստ պատգամավորի, դա ուղղակիորեն ապացուցեց:
«Հայաստանը՝ սկսած Ազգային ժողովից, պետք է սկսի գործընթաց՝ ԵՏՄ-ից դուրս գալու վերաբերյալ: Ինչո՞ւ: Հստակ մի քանի խնդիր կնշեմ: Ես գտնում եմ, որ ԵՏՄ-ն Հայաստանի համար եղել է ոչ թե հնարավորություն, ինչպես նշվում էր այն ժամանակ, ոչ թե եղել է տնտեսական առավելություններ տվող միություն, այլ ուղղակի եղել է մարտահրավեր բառիս բուն իմաստով»,- ասաց նա։
Պատգամավորը հանձնաժողովին առաջարկեց նախաձեռնության քննարկումը հետաձգել մեկ օրով, առաջարկը հավանության արժանացավ հանձնաժողովի անդամների մեծամասնության կողմից։
Եվրասիական տնտեսական միությունը տարածաշրջանային տնտեսական ինտեգրման միջազգային կազմակերպություն է։ Անդամ պետություններն են Հայաստանը, Բելառուսը, Ղազախստանը, Ղրղըզստանը և Ռուսաստանը: ԵՏՄ-ն ստեղծվել է ազգային տնտեսությունների բազմակողմանի արդիականացման, կոոպերացիայի, մրցունակության բարձրացման և անդամ պետությունների բնակչության կենսամակարդակի բարձրացման համար կայուն պայմաններ ստեղծելու նպատակով:
