ԵՐԵՎԱՆ, 23 մայիսի – Sputnik. Վարդան Բոստանջյանը լավատեսական սպասումներ ունի ԵՏՄ վարչապետների հանդիպումից։ Ըստ նրա` հանդիպումը թույլ է տալիս ենթադրել, որ տնտեսական հարաբերությունները հիմնական փուլ են մտնում։
«Դեռևս կենտրոնացված կառավարման տարիներին Հայաստանն ընդգծված տեղ է ունեցել։ Մենք այդ տարիներին ռադիոէլեկտրոնային, նավիգացիոն տեխնոլոգիաների առումով Հայաստանն աշխարհի 1/6-րդ հատվածի դոմինանտն էր, այսինքն` այն բոլոր տեղերում, որտեղ գիտելիքահեն կառավարման խնդիրներ կային, այդ պարտականությունը դրվում էր մեզ վրա»,- հիշեցնում է Բոստանջյանը` համոզմունք հայտնելով, որ այդ գիտակրթական պոտենցիալը մեր երկրում, չնայած արտագաղթին, դեռ պահպանվել է, և պետք է այն ճիշտ կիրառել։
Թաթուլ Մանասերյանն էլ հատկապես կարևորում է Հայաստանի մասնակցությունը ռազմաարդյունաբերական և շինարարական ոլորտներում։
«Պետությունը շատ մեծ դերակատարություն ունի, ինչպես ռազմարդյունաբերական համալիրում, այնպես էլ` շինարարության ոլորտում։ Հայաստանը կարող է որոշ չափով գրավել այն որմնախորշը, որն ունեին թուրքական ընկերությունները, և մեզ համար բարեբախտություն է, որ այդ պատվերները կրճատվում են ՌԴ-ում»,- ասաց Մանասերյանը։
Հայ տնտեսագետները վստահ են` ԵՏՄ-ն զգում է և զգալու է Հայաստանի կարիքն ու անպայման դիմելու է մեր մասնագետների օգնությանը։
