ԵՐԵՎԱՆ, 2 հունիսի — Sputnik. Ստեփանակերտի օդանավակայանը պատրաստ է շահագործման և կարող է գործարկվել մի քանի օրվա ընթացքում, լրագրողներին ասաց «Ազգային ավիացիոն միավորում» ՀԿ նախագահ Դմիտրի Աթբաշյանը։
«Ստեփանակերտի օդանավակայանն ամբողջությամբ պատրաստ է, այն կարող է շահագործման հանձնվել մի քանի օրվա ընթացքում։ Տեխնիկական սարքավորումները կան, այն այժմ գտնվում է փակ վիճակում», — ասաց Աթբաշյանը։
Նրա խոսքով` ինչպես թռիչքուղին, այնպես էլ շենքային համալիրն ու բոլոր աերոնավիգացիոն միջոցները պատրաստ են օգտագործման։
Ավիաինժեներ Գրիգորի Վարդանյանն ավելացրեց, որ թռիչքի ժամանակ օդանավակայանը 2 րոպե կգտնվի ադրբեջանական ռադիոլոկացիոն միջոցների տեսանելիության գոտում։
«Ուղղաթիռները ցածր բարձրության վրա հանգիստ թռչում են Ստեփանակերտ, դրանք այժմ գտնվում են ադրբեջանական ռադիոլոկացիոն միջոցների տեսանելիության գոտուց դուրս»,- ասաց Վարդանյանը։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկելու դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
