ԵՐԵՎԱՆ, 2 հունիսի-Sputnik. Բունդեսթագի կողմից Հայոց ցեղասպանության ճանաչումը իրարանցում է ստեղծել Թուրքիայում, հայտնում է www.sozcu.com.tr պարբերականը։
Ըստ հաղորդման` Գերմանիայում Թուրքիայի դեսպանը սկսել է հավաքել իրերը` սպասելով Անկարայից կոնկրետ հրահանգի։
Նշենք, որ ամեն անգամ, երբ որևէ երկիր ճանաչում է ցեղասպանությունը, Թուրքիայից կազմակերպվում է դեսպանի հետկանչ։
Միջազգային հանրությունն էլ համարժեք է արձագանքում Թուրքիայի այս քայլին։ Ըստ տարբեր մեկնաբանությունների` մի քանի ամիս հետո դեսպանը կվերադառնա Գերմանիա։
Թուրքական «Հուրիեթ» թերթն էլ հրապարակել է արտգործնախարար Մևլութ Չավուշօղլուի արձագանքը` Գերմանիայի խորհրդարանի կողմից Հայոց ցեղասպանությունը ճանաչող բանաձևի ընդունման վերաբերյալ։ Նա, մասնավորապես, նշել է, որ Գերմանիան ցանկանում է սեփական պատմության մութ էջերը ծածկել խորհրդարանի անպատասխանատու և անհիմն որոշումներով այլ երկրների պատմությունը սևացնելու միջոցով։
Թուրքիայի փոխվարչապետ Նուման Քուրթուլմուշն էլ Բունդեսթագի բանաձևի ընդունումը անվանել է պատմական սխալ։
