ԵՐԵՎԱՆ, 1 հունիսի- Sputnik. Գերմանիայի Բունդեսթագում Հայոց ցեղասպանության վերաբերյալ բանաձևի հնարավոր ընդունումը Թուրքիայի հետ հարաբերությունների երկարատև վատացման չպետք է հանգեցնի, չորեքշաբթի հայտարարել է Գերմանիայի արտգործնախարարության պաշտոնական ներկայացուցիչ Մարտին Շեֆերը։
«Կարող եմ ասել` ես ակնկալում եմ և հույս ունեմ, որ այն որոշումները, որոնք կարող են վաղն ընդունվել Բունդեսթագում, Թուրքիայի հետ հարաբերությունների երկարատև վատացման չեն հանգեցնի»,- ասաց նա։
Բունդեսթագը ծրագրում է Հայոց ցեղասպանության մասին բանաձևի նախագիծը քննարկել հունիսի 2-ին:
XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։
Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։
ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
