ԵՐԵՎԱՆ, 31 մայիսի — Sputnik, Անի Լիպարիտյան. Հայաստանի առաջին ազգային PR մրցանակաբաշխությունն անցկացվեց Երևանում, հայտարարվեցին հաղթողները 13 անվանակարգերում։
Հանդիսավոր միջոցառմանը հավաքվել էին տարբեր պետական և ոչ պետական կառույցների ներկայացուցիչներ։ Բոլորի տրամադրությունը շատ բարձր էր, հավաքվածները սպասում էին մրցանակաբաշխության արդյունքներին։
Բոլորին հայտնի է, որ այս կամ այն ընկերության, կազմակերպության PR աշխատանքից կախված է ոչ միայն իրենց ապագան։ Եթե հարցն ավելի գլոբալ ուսումնասիրենք, ապա, օրինակ, երկրի պաշտպանության նախարարության կողմից տեղեկատվության ճիշտ մատուցումից, տարածումից կախված է մի ամբողջ պետության անվտանգությունը։
Ի վերջո տարբեր PR ծառայությունների ճիշտ աշխատանքից կախված է երկրի վարկանիշը։ Հատկանշական է, որ տարվա իմիջային PR է ճանաչվել Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովը։
Մինչ Հայաստանի հանրային հեռուստառադիոընկերության նվագախումբը, դիրիժոր Երվանդ Երզնկյանի ղեկավարությամբ, տարբեր ստեղծագործություններ էր կատարում, կոստյումով տղամարդիկ և գեղեցիկ զգեստներով կանայք քննարկում էին բուն միջոցառումը` գուշակելով, թե ով է լինելու մյուս հաջողակը, ով տուն կտանի հաղթանակը։
Հանդիսավոր արարողության ժամանակ հայտարարվեցին PR մրցանակաբաշխության հաղթողները և մրցանակակիրները` 13 անվանակարգում։
Տարվա մամուլի քարտուղար անվանակարգում հաղթող ճանաչվեց ՀՀ պաշտպանության նախարարության մամուլի ծառայության ղեկավար Արծրուն Հովհաննիսյանը։
Տարվա հրապարակային գործիչ դարձավ Հայաստանի հանրապետական կուսակցության փոխնախագահ, Հայաստանի նախկին կրթության և գիտության նախարար, իսկ այժմ գրող և հեռուստահաղորդավար Արմեն Աշոտյանը։ Տարվա քաղաքական գործիչ անվանակարգին արժանացավ պատգամավոր Էդմոն Մարուքյանը։
Տարվա իրադարձություն անվանակարգում հաղթող ճանաչվեց «Wake up The Souls» շրջագայության շրջանակում Երևանում System Of a Down ռոք-խմբի համերգը։ Իսկ Հայաստանի հավաքականի կիսապաշտպան Հենրիխ Մխիթարյանը ճանաչվեց 2015 թվականի հայկական բրենդ։ Հատուկ մրցանակների արժանացան տեղեկատվական անվտանգության փորձագետ Սամվել Մարտիրոսյանը, ԼՂՀ նախագահի մամուլի քարտուղար Դավիթ Բաբայանն ու մյուսները։
Յուրաքանչյուր անվանակարգի համար մրցանակակիրներն ընտրվել էին հանրային կապերի ոլորտում անցկացված ուսումնասիրության արդյունքում։ Ուսումնասիրությանը մասնակցել է 50 փորձագետ, 50 խմբագիր և լրագրող, ինչպես նաև 7 ֆոկուս խումբ։
Ամենամյա ազգային «Հայկական PR մրցանակաբաշխությունը» նպատակ ունի համակարգել Հայաստանում հանրային կապերի ոլորտում իրականացվող լավագույն ծրագրերը, ինչպես նաև ըստ արժանվույն գնահատել հանրային կապերի մասնագետներին` նպաստելով Հայաստանում PR մշակույթի ձևավորմանն ու զարգացմանը։
