ԵՐԵՎԱՆ, 31 մայիսի — Sputnik. Միջոցառումը, որը նվիրված էր կիսանդրու բացմանը, սկսվեց Արարատյան Հայրապետական թեմի առաջնորդական փոխանորդ Նավասարդ արքեպիսկոպոս Կճոյանի աղոթքից հետո։
Հատուկ տրամադրություն ստեղծեցին երեխաները, ովքեր մարմնավորեցին Մխիթար Գոշին և նրա աշակերտներին։
Երկար սպասված արձանը բացվեց բազմաթիվ ելույթներից և ողջույնի խոսքերից մեկ ժամ հետո։ Բրոնզե կիսանդրու քանդակագործը ճարտարապետ Ղուկաս Չուբարյանն է (Չուբար), ով մահացել է 2009 թվականին։ Գոշի կիսանդրին Փաստաբանների պալատին նվիրել են բժիշկներ և բարերարներ Կառլեն և Սառա Եսայանները։
Արձանի վրա Գոշի իմաստուն խոսքերն են. «Օրենքները մարդու համար են, ոչ թե մարդը՝ օրենքների»։
Մխիթար Գոշը հայ միջնադարյան իրավունքի հիմնադիրն է, նա հայտնի Դատաստանագրքի հեղինակն է` Հայաստանի ֆեոդալական իրավունքի ժողովածուն, որը կազմել էր իրավագետը XII դարի վերջին, ժողովածուում սահմանված են դատավարության կարգն ու սկզբունքները։
Գիրքը բաղկացած է 251 հոդվածից և հայկական իրավագիտության ամենամեծ ձեռքբերումներից է։ Մինչև մեր օրերը հասել է միայն 40 ձեռագիր, որոնք պահպանվում են Մատենադարանում։ Դատաստանագիրքն առաջին անգամ հրատարակվել էր 1880 թվականին։
Օրենսգիրքն օգտագործվում էր Հայաստանում և Կիլիկիայում։
Պարտադիր օրենքի ուժ Մխիթար Գոշի դատաստանագիրքը ձեռք բերեց XIII դարում Կիլիկյան Հայաստանում։ XVI դարում այն ընդունվեց լեհ թագավոր Սիգիզմունդ I կողմից Լվովի, Կամենցե-Պոդոլսկի և այլ քաղաքների հայկական գաղութների համար։
1213 թվականին իրավագետ և հասարակական գործիչ Մխիթար Գոշը մահացել է հարազատ Նոր Գետիկ գյուղում` իրենից հետո թողնելով ոչ միայն մեծ իրավական ժառանգություն, այլև Նոր Գետիկ պատմական վանքը (Գոշավանք XII-XIII դդ)։
Կիսանդրու բացման արարողությանը ներկա էին Հայաստանի արդարադատության նախարար Արփինե Հովհաննիսյանը, Հայաստանի քննչական կոմիտեի նախագահ Աղվան Հովսեփյանը, Արարատյան Հայրապետական թեմի առաջնորդական փոխանորդ Նավասարդ արքեպիսկոպոս Կճոյանը, Հայաստանի խորհրդարանի փոխխոսնակ Հերմինե Նաղդալյանը, օմբուդսմեն Արման Թաթոյանը, Փաստաբանների պալատի նախագահ Արա Զոհրաբյանը, այլ պաշտոնատար անձինք, գրողներ, իրավաբաններ։
