ԵՐԵՎԱՆ, 30 մայիսի — Sputnik. «Երևանյան ամառ-2016» ծրագիրը, որի շրջանակներում կկազմակերպվեն մի շարք միջոցառումներ, կանցկացվեն զբոսայգիներում և Երևանի բոլոր վարչական կենտրոնների այլ հարթակներում հունիսի 1-ից օգոստոսի 31-ը, երկուշաբթի լրագրողներին ասաց Երևանի քաղաքապետարանի մշակույթի և տուրիզմի վարչության պետ Ռուբեն Հովհաննիսյանը։
Մայրաքաղաքում չորրորդ տարին անընդմեջ կանցկացվի «Երևանյան ամառ» եռամսյա միջոցառումների ծրագիրը՝ երեք հիմնական ուղղությամբ` մշակութային, զբոսաշրջային և մարզական: Արդեն ավանդական դարձած և սիրված ծրագրերից Երևանում կրկին կանցկացվեն «Պարում է հայը», «Երևան ՏԱՐԱԶֆեստ», «Ֆրեսկո», Ձմերուկի և Գարեջրի փառատոները:
Հովհաննիսյանի խոսքով` «Երևանյան ամառ» ծրագրի մի շարք միջոցառումներ սիրվել են ոչ միայն մեր համաքաղաքացիների, այլև Երևան այցելող զբոսաշրջիկների կողմից: Դրանցից մեկն էլ հայկական ուտեստների «Համով-հոտով Երևան» փառատոնն է։ Այն անցկացվում է պրոֆեսիոնալ խոհարարների մասնակցությամբ։
«Եվս մեկ ավանդական դարձած` «Երևան դրիֆթքինգ» ավտոշոուն նույնպես մեծ հետաքրքրության է արժանացել զբոսաշրջիկների կողմից», — ասաց Հովհաննիսյանը։
Արտաքին ձևավորման և գովազդի վարչության պետ Արազ Բաղդասարյանն իր հերթին նշեց, որ այս տարի Երևանի քաղաքապետարանը կրճատել է անցկացվող միջոցառումների բյուջեն, քանի որ ֆինանսական միջոցներն ուղղվել են և հետագայում էլ ուղղվելու են Լեռնային Ղարաբաղում զոհված և վիրավոր զինծառայողների ընտանիքներին։
