ԵՐԵՎԱՆ, 30 մայիսի — Sputnik. Եթե մարդը գալիս է պաշտոն զբաղեցնելու, դրան զուգահեռ ընտանիքի միակ կերակրողն է, ունի հիվանդ ծնողներ, բուհում սովորող ուսանող, ապա կամա, թե ակամա նա կաշառակեր է դառնում, համոզված է Ահարոն Ադիբեկյանը։
«Ուրեմն պետք է լինի ֆիլտր, որը կարողանա զտել պոտենցիալ կաշառակերի մուտքը դեպի կառավարման կառույցներ։ Ով գալիս է մեծ պաշտոնի, պետք է լինի ունևոր, կուշտ լինի։ Ինչու՞ Քենեդուն սիրով ընդունեցին։ Որովհետև ընտանիքը հարուստ էր, ունեցվածք ուներ»,- ասաց սոցիոլոգը։
Նրա կարծիքով` կոռուպցիան յուրահատուկ կերպով զարգանում ու արմատներ է գցում հատկապես աղքատ երկրներում։ Իսկ Հայաստանը նա դասում է հենց այդ երկրների շարքը։ Ամենակոռումպացված ոլորտներից մեկը, ըստ նրա, առողջապահությունն է։
«Կինս հիվանդ էր։ Նրան տարանք հիվանդանոց։ Բժիշկը կես ժամում մոտ 20 հիվանդություն ախտորոշեց, որոնց մեծ մասը միայն ինքն է կարողանում բուժել»,-ասաց նա` բազմակետեր դնելով, որովհետև դրանք ավելի քան խոսուն են։
Ասվածը հավելում է նաև մեկ այլ օրինակով` Ռուսաստանում վերջերս կինը դատի է տվել իր բժշկին, քանի որ 2 տարի շարունակ նա բուժել է մի հիվանդություն, որը գոյություն չի ունեցել։
![Агарон Адибекян и Александр Амарян Агарон Адибекян и Александр Амарян - Sputnik Արմենիա](https://cdn.am.sputniknews.ru/img/365/33/3653349_0:0:1280:720_600x0_80_0_0_468829b02b35997847885f80370c681d.jpg)
Ալեքսանդր Ամարյանի ուսումնասիրությամբ էլ ամենակոռումպացված ոլորտն արդարադատությունն է։ Նա հատուկ ընդգծեց, որ կաշառակերությունն ապացուցելը հայաստանյան պայմաններում դժվար է, քանի որ օրենքները միանշանակ չեն։
«Ես կարող եմ գալ ու ասել` պարոն Ադիբեկյան, այս փողը վերցրեք, պահեք ձեզ մոտ, նա պահի սեյֆում, հետևիցս մտնեն ու ասեն` դու կաշառք ես վերցրել։ Դե արի ու ապացուցի հակառակը։ Հետաքրքիր է, որ Հայաստանում բացահայտվում են կաշառակերության ցածր գումարներով դեպքերը։ Մինչև այսօր չեմ տեսել կաշառքը 10 հազար դոլարից ավելի լինի։ Հիմնականում` 30,40, 50 հազար դրամ»,-ասաց Ամարյանը։
Նա ահազանգում է` մի շարք երկրներ կան, որոնց ձեռնտու է կոռուպցիայի տարածվածությունը Հայաստանում։ Օրեր առաջ Ամարյանը կարդացել է ԱՄՆ հատուկ հետախուզության նախկին աշխատակցի հուշագրությունները, թե ինչ գործողություններ են իրականացրել Հարավսլավիայում և Սլովենիայում 90-ական թվականներին։
«Մի քանի միլիոն դոլար են տվել ՀԿ-ներին, քաղաքական գործիչներին, պետական մարմիններին կաշառելու համար։ Եթե կաշառակերությունը վերանա, նրանց համար Հայաստանում աշխատելը դժվար կլինի։ Հայաստանում ամենամեծ գումարները գալիս են ընտրությունների ժամանակ»,- ավելացրեց նա։
Երկու բանախոսներն էլ համակարծիք են` ամենալավ աշխատողը պետռեգիստրն է, հետո` ոստիկանությունը։ Շատ ժամանակ «աշխատում» են կրթական ցածր ցենզ ունեցող մարդկանց վրա։ Այնինչ արտասահմանյան շատ երկրներում ցանկացած խնդրի ժամանակ մարդիկ զանգահարում են իրենց փաստաբաններին։ Հայաստանում այս հարցը պատին է դեմ առնում, քանի որ աղքատության բարձր մակարդակ ունեցող երկրում դժվար է պատկերացնել հարցի այդօրինակ լուծումը։