ԵՐԵՎԱՆ, 26 մայիսի- Sputnik, Լաուրա Սարգսյան. Վաղ առավոտյան մեկնարկեց «Կոբալտ 2016»-ի ակտիվ փուլը՝ զորավարժության հրամանատարների հետ սիմուլյատիվ մակետի վրա ծրագրի մշակումով: Մակետը հենց այն տեղանքն էր, որտեղ ծավալվել էին «մարտական» գործողությունները:
Զորավարժություններում ներգրավված էր անձնակազմի շուրջ 600 անդամ, 40 միավոր հատուկ զրահատեխնիկա և չորս «Մի 24» և «Մի 8» մարտական և ռազմատրանսպորտային ուղղաթիռ:
«Կոբալտ 2016»-ի մասնակիցները մշակեցին ոստիկանական կառույցների գործողությունները և խափանեցին ահաբեկչական սպառնալիքը, չեզոքացրին զինված ավազակախմբերը՝ ազատ արձակելով պատանդներին:
«Այսօրվա զորավարժությունները ևս մեկ անգամ հաստատեցին, որ մենք ի վիճակի ենք մշակել համաձայնեցված մարտավարություն և ռազմավարություն հանցավորության դեմ պայքարում ժամանակակից սպառնալիքներին և մարտահրավերներին հակազդելիս»,- լրագրողների հետ զրույցում ասաց Հայաստանի ոստիկանության պետ, գեներալ-լեյտենանտ Վլադիմիր Գասպարյանը:
Գասպարյանը զորավարժությունների ավարտը դրական է համարում, սակայն դեռ աշխատելու տեղեր կան: Նրա կարծիքով՝ չնայած թերություններին՝ հայկական ստորաբաժանումը բավական փորձ ունի մյուսներին սովորեցնելու համար:
Նա նշեց, որ որոշ իրավիճակներում հայկական ստորաբաժանումն իրեն ավելի է դրսևորել, քան մյուսները: Սակայն բացահայտվել են կետեր, որոնք մշակման կարիք ունեն: Նրա խոսքով՝ ոչ ոք ապահովագրված չէ ահաբեկչությունից և տնտեսական, քաղաքական, կրոնական մարտահրավերներից:
«Մենք այստեղ ցույց չտվեցինք այն, ինչ կարող ենք: Մենք ցուցադրեցինք այն, ինչ պետք է ցույց տայինք»,- ասաց Գասպարյանը:
Զորավարժությունների ընթացքում մեծ ուշադրություն է հատկացվել կառավարման հարցերի մշակմանը, որն առանցքային պահ է կապի, սպառազինությունների, կառավարման միասնական համակարգի օպերատիվ համատեղելիության ապահովման համար, որը թույլ կտա խուսափել մեծ զոհերից և կնպաստի առաջադրանքների արդյունավետ իրականացմանը:
ՀԱՊԿ գլխավոր քարտուղար Նիկոլայ Բորդյուժան նույնպես հաջողված համարեց զորավարժությունները:
«Առաջին հերթին` մենք ստացանք լուրջ հետազոտական նյութ, երկրորդ` բացի ստորաբաժանումների ուսումնամարտական գործունեության էպիզոդների ցուցադրությունից, մենք մշակեցինք նաև հավաքական ուժերի կառավարման հարցեր, որոնք կձևավորվեն արագ արձագանքման հավաքական ուժերի կազմից՝ կոնկրետ պետությունում կոնկրետ գործողություն անցկացնելու համար»,- ասաց Բորդյուժան:
ՀԱՊԿ-ն հիմնվել և գործում է միայն անդամ երկրների տարածքային ամբողջականության և ինքնավարության ապահովման, անվտանգության և կայունության գոտիների ստեղծման շահերով:
Կազմակերպությունում կան շատ լծակներ` հետևյալ չափանիշների իրականացման համար. համատեղ քաղաքական գործունեություն, արտաքին քաղաքական գործունեության համակարգում, միջազգային հարթակներում ազգային շահերի պաշտպանություն, միավորման անդամ երկրների անվտանգության կոնկրետ խնդիրների ուղղությամբ աշխատանք:
Հատուկ մարտավարական զորավարժությունների հաջող ավարտից հետո «Բաղրամյան» զորավարժարանում կայացավ տարբեր երկրների ՆԳՆ ներկայացուցիչների պարգևատրման արարողությունը:
2010թ.-ին և 2013թ.-ին նման զորավարժություններ են տեղի ունեցել Ռոստովի մարզում, մասնակցել են նաև Հայաստանի ոստիկանության հատուկ նշանակության ուժերի միավորումները։
Զորավարժության անվանումը պատահական չի ընտրվել. Խորհրդային Միության տարիներին Աֆղանստանում մարտական գործողություններին մասնակցել է ՆԳՆ հատուկ ստորաբաժանումը, որը «Կոբալտ» է կոչվել։ Դրանից հետո զորավարժությունները կրում են հենց այդ ստորաբաժանման անվանումը։
