ԵՐԵՎԱՆ, 26 մայիսի — Sputnik. Նախապատրաստական փուլը մեկնարկեց «Բաղրամյան» ուսումնական զորավարժարանում ՀԱՊԿ անդամ-երկրների ոստիկանության զորավարժությունների ակտիվ փուլից առաջ։ Հրամանատարները ծրագիրը մշակում են սիմուլյատիվ մակետի վրա, հայտնում է Sputnik Արմենիայի թղթակիցը։
Հատուկ մարտավարական համատեղ զորավարժությունների ակտիվ փուլը կանցկացվի «Բաղրամյան» ուսումնական զորավարժարանում։ Զորավարժություններին կմասնակցեն ՀԱՊԿ գլխավոր քարտուղար Նիկոլայ Բորդյուժան, Հայաստանի ոստիկանապետ Վլադիմիր Գասպարյանը, Հայաստանի պաշտպանության նախարար, ՀԱՊԿ պաշտպանության նախարարների խորհրդի նախագահ Սեյրան Օհանյանը, ՀԱՊԿ անդամ-երկրների ԱԳՆ փոխնախարարները, ինչպես նաև ԱՊՀ հակաահաբեկչական կենտրոնի և ՇՀԿ տարածաշրջանային հակաահաբեկչական կառույցի ներկայացուցիչներ։
Զորավարժությունները բաղկացած են 6 փուլից։ Առաջինը` մասնակցություն արտակարգ իրավիճակի ռեժիմի ապահովմանը։ Երկրորդ` ապօրինի կառույցների հայտնաբերման և ոչնչացմանն ուղղված որոնողական աշխատանքների անցկացում։ Երրորդ` ահաբեկչական խմբավորումների շարասյուների ոչնչացում։
Չորրորդ փուլը` ապօրինի կառույցների և ահաբեկչական խմբավորումների վերացում և արգելափակման կազմակերպում։ Հինգերորդ փուլը` շենքում ահաբեկչական խմբերի և բանդաների վնասազերծում։ Վեցերորդ փուլ` ԱԻՆ ուժերով արտակարգ իրավիճակների վերացում։
«Կոբալտ 2016» մարտավարական հատուկ երկօրյա զորավարժություններին մասնակցում է անձնակազմի ավելի քան 500 անդամ, ներգրավված է շուրջ 20 միավոր հատուկ զրահատեխնիկա, չորս «Մի 24» և «Մի 8» ուղղաթիռ։
2010թ.-ին և 2013թ.-ին նման զորավարժություններ են տեղի ունեցել Ռոստովի մարզում, մասնակցել են նաև Հայաստանի ոստիկանության հատուկ նշանակության ուժերի միավորումները։
Զորավարժության անվանումը պատահական չի ընտրվել. Խորհրդային Միության տարիներին Աֆղանստանում մարտական գործողություններին մասնակցել է ՆԳՆ հատուկ ստորաբաժանումը, որը «Կոբալտ» է կոչվել։ Դրանից հետո զորավարժությունները կրում են հենց այդ ստորաբաժանման անվանումը։
