ԵՐԵՎԱՆ, 23 մայիսի — Sputnik. Վերջին օրերին տեղացած կարկուտը զգալի վնաս է հասցրել Արմավիրի մարզի 12 համայնքին, լրագրողներին ասաց գյուղատնտեսության նախարար Սերգո Կարապետյանը։
«Երեկ վարչապետի հետ եղել ենք Արմավիրի մարզում։ Մայիսի 18-ին, ինչպես նաև երեկ չէ առաջին օրը տեղի համայնքներում կարկուտ է գրանցվել։ Վնասն այդ համայնքներում կազմում է 30-80 տոկոս։ Այժմ մենք աշխատում ենք և վնասի չափի վերաբերյալ ամփոփ տեղեկատվություն կներկայացնենք», — ասաց Կարապետյանը։
Ինչ վերաբերում է այն տեղեկություններին, որ հակակարկտային կայաններն աշխատել են միայն կարկտահարությունից հետո, նախարարն ասաց. «Մի մասն, իհարկե, կապ չլինելու պատճառով չի աշխատել, այսպես են ասում: Հիմա այդ հարցն էլ է քննարկման փուլում, մենք վերջնականապես կներկայացնենք արտակարգ իրավիճակների նախարարությանը և դա կքննարկենք»:
«Հիդրոմետ» ծառայության տվյալների համաձայն` մայիսի 26-27-ը մի շարք մարզերում գիշերվա առաջին կեսին և օրվա երկրորդ կեսին անձրևներ են սպասվում, հավանական է կարկուտ, քամու ուժգնացում մինչև 25-26 մ/վ։
Հիդրոօդերևութաբանության կենտրոնի պետ Զարուհի Պետրոսյանի խոսքով` Հայաստանում կարկուտների շրջան է սկսվել, և այն կարող է տևել մինչև հունիսի վերջ, իսկ հետո արդեն եղանակը կհանդարտվի։
