ԵՐԵՎԱՆ, 5 մայիսի — Sputnik. Նորայր Շողիկյանը Խաչատուր Աբովյանի անվան հայկական պետական մանկավարժական համալսարանի ավագ դպրոցի աշակերտական խորհրդի նախագահն է։ Պատմում է` ամսական կտրվածքով աշակերտական խորհրդի նիստ են հրավիրում ու վերհանում բազմաբնույթ հարցեր։ Նրա ղեկավարությամբ ամենախոշոր ծրագիրը ԱԳՆ-ի շենքի դիմաց իրագործած ֆլեշմոբն էր։
«Կազմակերպեցինք քառօրյա պատերազմից հետո։ Դրա միջոցով մեր բողոքն էինք հաղորդում պատկան մարմիններին ու միջազգային հանրությանը, կոչ էինք անում դադարեցնել կրակը։ Ռազմահայրենասիրական այլ ծրագրեր էլ ենք իրականացրել»,-պատմեց Շողիկյանը։
Այլ ծրագրերի շարքում հատկանշական է տնտեսական ապրանքներ հավաքագրելն ու Տավուշի մարզի սահմանային զորամասեր ուղարկելը։
Հայաստանի Երիտասարդական հիմնադրամի գործադիր տնօրեն Ալեքսանդր Տեր-Հովակիմյանը մեզ հետ զրույցում ասաց, որ աշակերտական խորհուրդների նախաձեռնություններն իրենք անպատասխան չեն թողնում, չեն սահմանափակում, ավելին` աջակցում են ու իրենց «համեստ լուման ներդնում»։
«Այսօր աշակերտական խորհուրդն անդամակցում է եվրոպական աշակերտական խորհուրդների միավորմանը։ Մենք պետք է հասկանանք, որ դա դարբնոց է ակտիվ երիտասարդների ձևավորման գործում»։
Երեկ` մայիսի 24-ին, ԼՂՀ վարչապետի մամուլի խոսնակ Արտակ Բեգլարյանը ֆլեշմոբ հայտարարեց` մեկնել Արցախ, լուսանկարվել տեսարժան վայրերից որևէ մեկում և լուսանկարը տեղադրել համացանցում` այդպիսով նույն քայլերն անելու «մարտահրավեր» նետելով մյուսներին։ Միջոցառման ժամանակ դպրոցականները ֆլեշմոբին միանալու պատրաստակամություն հայտնեցին։
ԼՂՀ վարչապետի մամուլի խոսնակ Արտակ Բեգլարյանի հայտարարած ֆլեշմոբին նաև աշակերտներին ներգրավելու հարցին ի պատասխան Տեր-Հովակիմյանն ասաց, որ եթե աշակերտները նման բան նախաձեռնեն, իսկ դրան չհակասի տարիքային գործոնը, ապա իրենք այդ նախաձեռնությանը ևս կընդառաջեն։
Վիկ Դարչինյանը նույնպես միացել է Արտակ Բեգլարյանի կոչին>>
