ԵՐԵՎԱՆ, 25 մայիսի- Sputnik. Ազգային ժողովն առաջին ընթերցմամբ ընդունեց ՀՀ Աշխատանքային օրենսգրքում լրացումներ կատարելու մասին կառավարության առաջարկը:
Ապրիլի 1-ից հետո կամավորականների համար սահմանվում են լիարժեք երաշխիքներ` աշխատատեղի պահպանում և աշխատավարձի վճարման կազմակերպում կամավորական հիմունքներով մարտական գործողություններին մասնակցելու ժամանակահատվածում: Այս իրավունքը տարածվում է նաև ապրիլի մեկից հետո առաջացած հարաբերությունների վրա:
«Կան գործատուներ, ովքեր ազատել են մարտական գործողությունների գոտի մեկնած կամավոր իրենց աշխատողներին: Աշխատատեղի պահպանման երաշխիքը բոլոր կազմակերպությունների վրա է տարածվելու: Սա իրավական հիմք է, որով հստակ իրավական լուծում է տրվում և կամավորության տվյալ ժամանակահատվածում տվյալ անձինք ունենում են կարգավիճակ, համապատասխան երաշխիքներ»,- ասաց աշխատանքի և սոցիալական հարցերի նախարար Արտեմ Ասատրյանը։
Նախարարի խոսքով` նախագծում հստակ սահմանվում է, որ աշխատողն ազատվում է ՊՆ ոլորտում պետական լիազոր մարմնի տրամադրած կամավորական համարվելու մասին տեղեկանքի հիման վրա։
Պատգամավորների շրջանում ակտիվ քննարկման թեմա է դարձել աշխատավարձի հարցը։ Առաջարկներ են եղել նաև պետական սուբսիդիաներ տրամադրելու վերաբերյալ, որպեսզի անկախ աշխատանքի վայրից` յուրաքանչյուր կամավոր միջին կամ թեկուզ նվազագույն աշխատավարձ ստանա։
