ԵՐԵՎԱՆ, 25 մայիսի — Sputnik. ՀՀ ԿԳՆ գիտության պետական կոմիտեի նախագահ Սամվել Հարությունյանն «անհեթեթ» որակեց այն հայտարարությունները, որ Հայաստանում ռազմական արդյունաբերություն չկա` հիշեցնելով, որ Հայաստանում զենքի արտադրություն միշտ է եղել, և հատկապես անկախության առաջին տարիներին։
«Հատկապես հետխորհրդային շրջանում` առաջին ղարաբաղյան պատերազմից հետո մենք ունեցել ենք ձեռնարկություններ, որոնք զենք-զինամթերք են արտադրել։ Խորհրդային շրջանում մեր գիտական հիմնարկների 70 %-ը, որոնք զբաղվում էին կիրառական խնդիրներով, առաջին հերթին զբաղվում էին երկակի նշանակության ծրագրերով, և ԽՍՀՄ բոլոր ռազմական խնդիրներին Հայաստանի գիտնականները լուրջ մասնակցություն են ունեցել»,- ասաց Սամվել Հարությունյանը։
Ավելին, Գիտության պետական կոմիտեի նախագահը վստահեցրեց, որ Հայաստանում նաև ԱԹՍ-ներ են արտադրվում և արտահանվում։ Իսկ ատոմային ռումբ, որի մասին հայտարարել է Հրանտ Բագրատյանը, Հարությունյանի խոսքով` Հայաստանը չունի և չի էլ պատրաստվում ունենալ։
