ԵՐԵՎԱՆ, 25 մայիսի- Sputnik. Գիտությունը սահմաններ չունի, և ԵԱՏՄ անդամ լինելով` Հայաստանը կարող է համատեղ գիտական ծրագրեր իրականացնել ԵՄ անդամ երկրների հետ, չորեքշաբթի լրագրողների հետ հանդիպմանն ասաց ՀՀ ԿԳՆ
Գիտության պետական կոմիտեի նախագահ Սամվել Հարությունյանը։
«Ոչ ոք չի կարող արգելել Հայաստանին համատեղ գիտական ծրագրեր իրականացնել աշխարհի ցանկացած երկրի հետ, ոչ ոք նման իրավունք չունի։ Գիտությունը բաց համակարգ է և սահմաններ չունի։ Ոչ մի տարօրինակ բան չկա, որ մենք ԵԱՏՄ մեջ ենք, բայց գիտության ոլորտում եվրաինտեգրման ասոցացման համաձայնագիր ստորագրած առաջին պետություններից ենք»,- ասաց Սամվել Հարությունյանը։
Նա հավելեց, որ նախկին ԽՍՀՄ երկրներից այդ փաստաթուղթը ստորագրել են միայն Մոլդովան, Ուկրաինան և Վրաստանը։
«Իսկ մնացած պետությունների առաջ ԵՄ-ն իր դռներն արդեն փակում է»,- ասաց գիտության կոմիտեի նախագահը։
Ի դեպ, Սամվել Հարությունյանը նաև տեղեկացրեց, որ առանց համաձայնագրի էլ գիտության ոլորտում Հայաստանի հիմնական գործընկերները հենց եվրոպական երկրներն են։ Պաշտոնական տվյալներով` համատեղ գիտական աշխատանքների 50-55%-ը հայ գիտնականներն իրականացնում են ԵՄ երկրների, 20-25%-ը` ԱՄՆ-ի և միայն 12-13%-ը` ՌԴ-ի հետ։
Սամվել Հարությունյանը տեղեկացրեց, որ այս համաձայնագիրը ՀՀ գիտական կազմակերպություններին, բուհերին, գիտնականներին ու ասպիրանտներին հնարավորություն կտա մասնակցել միջազգային ծրագրերի, օգտվել Եվրոպական խոշոր համալսարանների գիտական ենթակառուցվածքներից։
«Հորիզոն 2020»-ի ֆինանսական ծավալը 2014-20թթ-ի համար 84 մլրդ եվրո է, ուստի ծրագրին միանալով` հայ գիտական հանրությունը նաև գիտական ծրագրերի ֆինանսավորման նոր աղբյուր է ձեռք բերում։
Պատասխանելով գիտական ներուժի արտագաղթի մասին Sputnik Արմենիայի հարցին` Սամվել Հարությունյանը հույս հայտնեց, որ այս նոր ֆինանսական հնարավորությունները թույլ կտան որոշ չափով կանխել այն, եթե, իհարկե, մեր երկիրը ճիշտ օգտվի իրեն ընձեռված նոր հնարավորությունից։
