ԵՐԵՎԱՆ, 20 մայիսի — Sputnik. Հայաստանը միացել է Եվրամիության «Հորիզոն — 2020» հետազոտությունների և նորարարության շրջանակային ծրագրին, հայտնում է ՀՀ ԱԳՆ մամուլի ծառայությունը։
Մայիսի 19-ին Բրյուսելում տեղի է ունեցել Հայաստանի Հանրապետության կառավարության և Եվրոպական հանձնաժողովի միջև Եվրոպական միության «Հորիզոն — 2020» հետազոտությունների և նորարարության շրջանակային ծրագրին Հայաստանի Հանրապետության մասնակցության վերաբերյալ համաձայնագրի ստորագրումը:
Հայկական կողմից համաձայնագիրը ստորագրել է ՀՀ կրթության և գիտության նախարար Լևոն Մկրտչյանը, Եվրոպական միության կողմից` ԵՄ Հետազոտության, գիտության և նորարարության հարցերով հանձնակատար Կարլոս Մոյդսը:
«Հորիզոն-2020» շրջանակային ծրագիրն իրականացվելու է մինչև 2020 թվականը: Ծրագրին Հայաստանի մասնակցությունը կնպաստի մեր գիտական համայնքի հետազոտությունների եվրոպական տարածք ինտեգրվելուն, եվրոպական առաջատար գիտական կենտրոնների հետ համագործակցությանը, նորարարական մոտեցումների և մեթոդների զարգացմանը, ինչը կնպաստի Հայաստանում կայուն զարգացման ծրագրերին: Միաժամանակ այս ոլորտներում սերտ համագործակցությունը նոր որակ կհաղորդի Հայաստան-Եվրոպական միություն հարաբերություններին:
