ԵՐԵՎԱՆ, 25 մայիսի- Sputnik. Մոսկվայում մայիսի 28-ին տեղի կունենա Armfashionday մոդելավորող-դիզայներների աշխատանքների ցուցադրությունը, հաղորդում են ցուցադրության կազմակերպիչները։
Դիզայներական աշխատանքների ցուցադրությունն անցկացվում է արդեն երկրորդ անգամ, այս տարի ցուցադրությանը կմասնակցեն կոստյումների և աքսեսուարների հայ մոդելավորողներ։ Միջոցառման նպատակն է մեկ հարթակում լայն հասարակությանը ներկայացնել տաղանդավոր հայ դիզայներների յուրօրինակ զգեստները։
Մոդելավորողների թվում են Արամ Նիկոլյանն իր նոր «Ուրֆա» հավաքածուով, Terian Art Centre-ի ղեկավար Լիլիթ Մելիքյանը, ով կներկայացնի իր նոր «Կարպետ» և «Խաչքար» հավաքածուները, El'ka հարսանյաց սրահի հիմնադիր Հասմիկ Աբրահամյանը կցուցադրի հարսանեկան զգեստներ իր նոր հավաքածուից։ Կան մասնակիցներ Մոսկվայից` մոդելավորող Անի Մանուկյանը, ով կցուցադրի երեկոյան զգեստների հավաքածու, իսկ Varda TM ապրանքանիշի լողազգեստները կներկայացնի մոդելավորող, անվանի պարուհի Վարդանուշ Մարտիրոսյանը։
Շոուի շրջանակում կանցկացվի մրցույթ, որին կմասնակցեն երեք սկսնակ մոդելավորողներ` Մարգարիտ Նանուշյանը, Տիգրան Վահանյանը և Ռոզա Մինասյանը։
«Նրանք հնարավորություն կունենան ներկայացնել իրենց և մասնակցել նման լայնածավալ միջոցառմանն արդեն կայացած մոդելավորող-դիզայներների հետ։ Մրցույթի հաղթողը հնարավորություն կունենա երկու ամիս վաճառքի դնել իր հավաքածուն մոսկովյան մուլտիբրենդային խանութներից մեկում»,- ասվում է հաղորդագրությունում։
Դիզայներների աշխատանքները կգնահատի փորձագիտական ժյուրին, որի կազմում ընդգրկված են Արմեն Երիցյանը, կոշիկի դիզայներ Տիգրան Ալբերտին և ոճաբան Եսայի Սիմիկյանը։
Հայազգի դիզայները կոշիկների առաջին հավաքածուն է ներկայացրել Փարիզում>>
Armfashionday-ն արդեն դարձել է Ռուսաստանի և Հայաստանի նորաձևության արդյունաբերության խոշոր իրադարձություն։
Ցուցադրությանը կմասնակցեն նաև մոդելավորող Յանա Շևչենկոն, իտալացի օպերային և փոփ երգչուհի Աննա Ազերլին, նորաձև հագուստի դիզայներ Յուլիա Դալլաքյանը, հագուստի և աքսեսուարների դիզայներ Սվետլանա Եվստիգնեևան, դերասանուհի և երգչուհի Աննա Կալաշնիկովան, երգիչ Յուրի Տիտովը և ուրիշներ։
Armfashionday-ն առաջին անգամ անցկացվել է Մոսկվայում 2015թ.-ին, դրան մասնակցել է շուրջ 500 մարդ։
