ԵՐԵՎԱՆ, 24 մայիսի — Sputnik. Երևանում ավերածություններ գործած քամին անսպասելի չէ, բայց սպասվածից ուժեղ էր։ «Հիդրոմետ» ծառայության օդերևութաբանության կենտրոնի պետի տեղակալ Գագիկ Սուրենյանն այսօր լրագրողներին հայտնեց, որ կանխատեսված 17-20 մետր վայրկյանի փոխարեն քամու ուժգնացումը երեկ մայրաքաղաքում հասել է 25-26 մետրի։
Ամենաուժեղ քամին երեկ գրանցվել է Դավիթաշենում`26 մետր վայրկյանում։ Վայրկյանում 25 մետրի հասնող քամիներ են գրանցվել նաև Աշտարակում և Գավառում, որտեղ ևս ավերածություններ են եղելել։ Իսկ Գյումրին հազիվ է խուսափել տորնադոյից։
«Գյումրիում ձևավորվել է հզոր կույտ անձրևային ամպամածության գոյացություն, որը հասել է այն վիճակի, որ եթե մի փոքր էլ`2-3% զարգացում գնար, հզոր տորնադո էր ձևավորվելու։ Բայց, բարեբախտաբար, ամպը բեռնաթափվել է, և տորնադո չի ձևավորվել»,- ասաց Գագիկ Սուրենյանը։
Մի շարք գյուղերում էլ երեկ անձրևի փոխարեն կարկուտ է տեղացել։ Դե իսկ վատ եղանակը, ինչպես հայտնեց Սուրենյանը, Հայաստան դեռ նոր է եկել և չի շտապում հեռանալ։
«Մայիսի 26-ին, 27-ին, 28-ին, 29-ին, 30-ին հանրապետության տարածքին դարձյալ մոտենում է հերթական ցիկլոնը։ Բայց այս պրոցեսի առանձնահատկությունն այն է, որ ցերեկը կլինի առավելապես արևառատ, տաք եղանակ և միայն երեկոյան ժամերին սպասվում են անձրևներ, ամպրոպ, ամպրոպների ժամանակ քամու ուժգնացում` առանձին հատվածներում` 20-25 մետր վայրկյան արագությամբ, և առանձին հատվածներում բավականին մեծ է կարկտահարման վտանգը»,- ասաց Գագիկ Սուրենյանը։
Կարկուտներից բացի, մինչև մայիսի վերջը Հայաստանին նաև ուժեղ քամիներն են սպառնում։ Բայց ոչ այնքան ուժեղ, որքան երեկ։
Իսկ հունիսին և՛օդի ջերմաստիճանը, և՛ տեղումների քանակը նորմայի սահմաններում է կանխատեսվում։ Եվ, քանի որ այդ նորման բավականին բարձր է, անձրևներն ու կարկուտները հունիսին կրկին շատ են լինելու։
