ԵՐԵՎԱՆ, 24 մայիսի — Sputnik-ի մամուլի ծառայություն. Sputnik.Կարծիք հարցախույզի տվյալներով` եվրոպացիների գրեթե կեսը` 49%-ը, պատասխանել է, որ Թուրքիան կամ երբեք չի անդամակցի ԵՄ-ին, կամ էլ կանդամակցի 10 կամ ավելի տարի հետո: Տվյալները ստացվել են հարցախույզի արդյունքում, որն անցկացրել են ֆրանսիական Ifop հետազոտական ընկերությունը և բրիտանական Populus ընկերությունը` Sputnik տեղեկատվական գործակալության և ռադիոյի պատվերով։
«Ձեր կարծիքով` Թուրքիան ե՞րբ կանդամակցի ԵՄ-ին» հարցին ֆրանսիացիների 17%-ը, գերմանացիների 27%-ը և բրիտանացիների 38%-ը պատասխանել է, որ Թուրքիան ԵՄ-ին կանդամակցի մոտակա 10 տարվա ընթացքում: Այդ հարցին չի կարողացել պատասխանել Մեծ Բրիտանիայում հարցված մարդկանց 29%-ը, Ֆրանսիայում հարցվածների 28%-ը և Գերմանիայում` 15%-ը:
Մեծ Բրիտանիայում հարցումն անցկացրել է Populus խոշորագույն հետազոտական ընկերությունը 2016 թվականի ապրիլի 15-21-ն ընկած ժամանակահատվածում։ Ֆրանսիայում և Գերմանիայում հարցումն անցկացրել է IFop խոշորագույն հետազոտական ընկերությունը 2016 թվականի ապրիլի 14-18-ն ընկած ժամանակահատվածում։ Հարցմանը մասնակցել են Մեծ Բրիտանիայի (1045), Գերմանիայի (989) և Ֆրանսիայի (1008) քաղաքացիները։ Ընտրանքն իրականացվել է ըստ հարցվածների սեռի, տարիքի, բնակության վայրի: Տվյալների վստահության միջակայքը տատանվում է +/- 3,1%-ի սահմաններում` 95% վստահության հավանականության դեպքում:
Հասարակական կարծիքի ուսումնասիրման միջազգային նախագիծը մեկնարկել է 2015 թվականի հունվարին։ Գործընկերն են Populus, Ifop և Forsa հայտնի հետազոտական ընկերությունները։ Sputnik.Կարծիք նախագծի շրջանակում կանոնավոր կերպով հասարակական կարծիքի հարցումներ են անցկացվում Եվրոպայի և ԱՄՆ-ի երկրներում առավել արդիական սոցիալական և քաղաքական հարցերի վերաբերյալ։
Sputnik-ը (sputniknews.com) լրատվական գործակալություն է և ռադիո` տասնյակ երկրներում մուլտիմեդիոն տեղեկատվական ներկայացուցչություններով: Sputnik-ը ներառում է ավելի քան 30 լեզվով կայքեր, անալոգային և թվային ռադիոհեռարձակում, բջջային հավելվածներ և էջեր սոցիալական կայքերում։ Sputnik-ի լուրերը շուրջօրյա ռեժիմով թողարկվում են անգլերեն, արաբերեն, իսպաներեն և չինարեն լեզուներով:
