ԵՐԵՎԱՆ, 23 մայիսի — Sputnik. Էստրադային երգիչները զինծառայողներին հոգեպես աջակցելու նպատակով հաճախ են մեկնում առաջնագիծ։ Օրեր առաջ Ղարաբաղից է վերադարձել նաև երգիչ Էրիկը և Ղարաբաղում անցկացրած օրերի մասին պատմել Sputnik Արմենիա ռադիոկայանի եթերում:
«Մենք Ղարաբաղ մեկնեցինք մեր տղաներին ոգեշնչելու համար, և խոստովանում եմ` զարմացած էի նրանց մարտական տրամադրվածությամբ և ոգու ամրությամբ: Մենք ուզում էինք նրանց ոգեշնչել, բայց հակառակը ստացվեց», — Sputnik Արմենիա ռադիոկայանի եթերում ասաց Էրիկը:
Հայ զինվորների հետ հանդիպելուց հետո երգիչը հասկացել է, որ երկիրն ապահով ձեռքերում է:
«Ոչ ոք չի հանդգնի քայլ անել մեր հողերի, մեր զինծառայողների դեմ։ Նրանք իրենց կյանքի գնով մեծ գործ են կատարում», — ասաց Էրիկը։
Երաժիշտը պատմեց, որ վերջին շրջանում մի տեսահոլովակ էր նկարահանվել, որի նպատակն էր ներկայացնել հայ հասարակական գործիչներին ու նրանց երկրորդ կեսին:
«Նկարահանումների ժամանակ ես հասկացա, որ այսօր «հայտնին» ես կամ տեսահոլովակում նկարահանվող իմ ընկերները չենք: Հայտնիները զինծառայողներն ու նրանց սպասող սիրելիներն են», — ասաց Էրիկը:
Երգիչն ավելացրեց, որ չափազանց ազդվել է հատկապես մի աղջկա մեկնաբանությունից։ Նա տեսահոլովակի տակ գրել է. «Մնաց 38 օր, և իմ զինվորը տուն կվերադառնա»:
Էրիկն այսօր փոքր-ինչ ափսոսում է, որ իր երգացանկում հայրենասիրական երգեր չունի, և խոստովանում է, որ կուղղի բաց թողումը: Երգիչը ծնվել է Վրաստանում և միայն Հայաստանում է կարողացավ իսկապես հասկանալ, թե ինչ է հայրենիքն ու սերը հայրենիքի նկատմամբ:
