ԵՐԵՎԱՆ, 23 մայիսի — Sputnik. 68 կգ քաշային կարգում հանդես եկող թաեքվանդոիստ Սերգեյ Վարդազարյանը երրորդ տեղն է զբաղեցրել Շվեյցարիայի Մոնտրյո քաղաքում անցկացվող թաեքվանդոյի մրցաշարում` առավելության հասնելով իտալացի, թուրք և ադրբեջանցի մարզիկների նկատմամբ:
«Թուրք և Ադրբեջանցի մարզիկները ֆիզիկապես շատ ուժեղ էին և լավ պատրաստված», — ասաց Վարդազարյանը:
Մարզիչ Արսեն Ավետիսյանը մինչև առաջնությունը մարզիկին ասել էր, որ իրենց միայն հաղթանակ է պետք, և կարևոր չէ, որ նա մինչ այդ նման լուրջ մրցումների չի մասնակցել:
Ինչպես խոստովանել է մարզիչը, Վարդազարյանը մարտական էր տրամադրված, նրա հոգեբանական վիճակի վրա ազդել էր ղարաբաղյան քառօրյա պատերազմը:
Շվեյցարիայում մայիսի 19-22-ն անցկացվող թաեքվանդոյի Եվրոպայի առաջնությունում Հայաստանը, հավաքականի գլխավոր մարզիչ Գևորգ Դանիելյանի գլխավորությամբ, ներկայացնում էր վեց մարզիկ` Վարագ Աղաջանյանը (54 կգ), Հայկազ Սամվելյանը (58 կգ), Սերգեյ Ավանեսովը (63 կգ), Սերգեյ Վարդազարյանը (68 կգ), Դավիթ Վարդումյանը (74 կգ) և Արման Երեմյանը (87 կգ):
