ԵՐԵՎԱՆ, 8 սեպտեմբերի – Sputnik. Հայաստանը մտադիր է միանալ ԵՄ Հորիզոն 2020 ծրագրին, նշվել է ՀՀ կրթության և գիտության նախարարությունում հրավիրված միջգերատեսչական աշխատանքային խորհրդակցության ժամանակ։
Խորհրդակցությունում քննարկվել է 2016 թվականի պետական բյուջեի գիտական և գիտատեխնիկական գործունեության ծրագրով բյուջետային հայտի առաջարկը:
Նշվել է, որ 2016 թվականի Գիտության ոլորտի հատկացումների աճը հիմնականում ուղղվելու է Եվրոպական Միության Հորիզոն 2020 գիտական ծրագրի անդամակցության վճարի կատարմանը՝ ակնկալելով, որ հետագայում Հորիզոն 2020-ի շրջանակում ՀՀ գիտական համակարգը կընդգրկվի դրամաշնորհային տարբեր ծրագրերում՝ ապահովելով ֆինանսական հոսքեր գիտության ոլորտում:
Գիտության պետական կոմիտեի նախագահ Սամվել Հարությունյանը տեղեկացրել է, որ այս տարի հիմնականում պահպանվել են նախորդ տարվա գիտական ծրագրերի գերակայությունները: Ընդհանուր առմամբ, գալիք տարվա բյուջեի նախագծով առաջարկվում է ոլորտին հատկացնել 14 մլրդ 400 մլն դրամ գումար:
Քննարկման ընթացքում ներկայացվել են նաև մտահոգություններ ու առաջարկություններ՝ ֆինանսավորման ծավալների առնչությամբ:
Միջգերատեսչական հանձնաժողովը դրական եզրակացություն է տվել բյուջետային հայտին, որը սահմանված կարգով կներկայացվի կառավարություն, որտեղ կընթանան հիմնական քննարկումները և հայտը, ստանալով վերջնական տեսք, կներկայացվի ԱԺ քննարկմանը:
Խորհրդակցությունը վարել է ՀՀ ԿԳ նախարար Արմեն Աշոտյանը, քննարկմանը մասնակցել են ՀՀ ԳԱԱ նախագահ Ռ. Մարտիրոսյանը, ՀՀ ԿԳՆ գիտության պետական կոմիտեի նախագահ Ս. Հարությունյանը, շահագրգիռ պետական գերատեսչությունների ներկայացուցիչներ:
Հայաստանը մտադիր է միանալ ԵՄ Հորիզոն 2020 գիտական ծրագրին
© Sputnik / Владимир Астапкович
/ Բաժանորդագրվել
Հորիզոն 2020-ի շրջանակում ՀՀ գիտական համակարգը կընդգրկվի դրամաշնորհային տարբեր ծրագրերում
