ԵՐԵՎԱՆ, 20 մայիսի — Sputnik. Վարկանիշավորման երեք տարվա փորձը ցույց տվեց, որ բուհերի ներկայացուցիչների մոտ հարցեր են առաջանում, թե ինչ մեթոդաբանության և չափանիշների հիման վրա է գնահատվում այս կամ այն հաստատությունը։
Այդ մասին լրագրողներին ասաց Կրթական տեխնոլոգիաների ազգային կենտրոնի տնօրեն Արտակ Պողոսյանը մինչև վարկանիշավորման համակարգի քննարկմանը նվիրված աշխատաժողովի սկսվելը։
«Հայաստանում արդեն երրորդ տարին է անցկացվում բուհերի, ինչպես նաև հանրակրթական հաստատությունների վարկանիշավորում։ Այսօրվա միջոցառման ժամանակ տարբեր հայկական բուհերի ներկայացուցիչների հետ միասին քննարկենք վարկանիշավորման հարցերը, մեթոդաբանությունը, ինչպես նաև կլսենք նրանց առաջարկները», — ասաց Պողոսյանը։
Նրա խոսքով` նախատեսվում է արդյունավետ մեթոդաբանություն և վարկանիշավորման վստահելի համակարգ ստեղծել հենց այս քննարկումների հիման վրա։ Քննարկումների արդյունքում փորձ է արվելու որոշակի փոփոխություններ և լրամշակումներ անել։
Կենտրոնի տնօրենն ավելացրեց, որ, օրինակ, եթե այս կամ այն բուհն անցյալ տարի բուհերի որոշակի խմբում զբաղեցրել է առաջին տեղը, ապա դա չի նշանակում, որ նույնը արդյունքը կլինի նաև այս տարի։ Նրա խոսքով` բուհերը պետք է փոխեն իրենց դիրքը վարկանիշում։
Պողոսյանը նաև ընդգծեց, որ վարկանիշավորմանը մասնակցելը պարտադիր չէ։
«Կան մասնավոր բուհեր, որոնք հրաժարվում են մասնակցել վարկանիշավորմանը։ Յուրաքանչյուր բուհ ինքն է որոշում մասնակցե՞լ գործընթացին, թե՞ ոչ», — նշեց Պողոսյանը։
Նա նշեց, որ լավ արդյունքների վրա ազդում է բուհում իրականացվող գիտական գործունեությունը։
«Իհարկե մենք հաշվի ենք առել մեր կրթական համակարգի առանձնահատկությունները, որոնք պետք է համահունչ լինեն պետության քաղաքականության հետ։ Այդ իսկ պատճառով գոյություն ունեն վարկանիշավորման որոշակի խմբեր. սովորողների խմբեր, սովորողների արդյունքներ, գիտահետազոտական աշխատանքներ, աշխատաշուկա, ընդհանուր գնահատական և այլն։ Այս ամենն ազդում է վարկանիշավորման ցուցանիշի վրա», — ասաց կենտրոնի ղեկավարը։
Պողոսյանը նշեց, որ ուսանողների և դասախոսների շրջանում անցկացվող հարցումները թույլ են տալիս բարձրացնել բուհերի վարկանիշավորումն ու ավելի արդյունավետ և որակյալ կրթություն կազմակերպել։
Ինչպես նշեց Եվրոպական տարածաշրջանային կրթական ակադեմիայի ուսումնական գծով պրոռեկտոր Հուսիկ Գևորգյանը, նախկինում բուհեր էին ուղարկվում վարկանիշավորման աղյուսակները, որոնք պարզապես պետք է լրացվեին։
Նա նշեց, որ ինքն ու մի խումբ դասախոսներ կցանկանային ավելացնել գիտական աշխատանքներ ունեցող ուսանողների ակտիվության մասին դրույթ։
Գևորգյանը վարկանիշավորումը կարևոր է համարում այն տեսանկյունից, որ բուհերը կիմանան իրենց թույլ կողմերն ու կաշխատեն իրենց որակի բարձրացման ուղղությամբ։
Քննարկումների ընթացքում նաև ձևավորվել է հայկական բուհերի դասախոսների մեկ այլ խումբ, ովքեր ավելի մեծ նշանակություն են տվել ուսանողների քանակին կոնկրետ բուհում և ուսումնական ծրագրերին։
ԵՊՀ-ի ուսումնական գործընթացի վերահսկման բաժնի ղեկավար Արմեն Սարգսյանը նշեց, որ արդեն երրորդ տարին ԵՊՀ-ն բոլոր չափանիշներով Հայաստանի շատ բուհերի թվում առաջատարն է։
«Վարկանիշավորման հարցերի ակտիվ քննարկումներն աշխատանքն ավելի արդյունավետ կդարձնեն», — պարզաբանել է նա։
Բացի այդ` ակտիվ քննարկվել է նաև միասնական պետական քննությունների հարցը, դիմորդների ընդունման և գնահատման կարգը, կարևոր այլ հարցեր, որոնք ազդում են վարկանիշավորման վրա։
Սարգսյանն ավելացրեց, որ նման համակարգն առողջ մրցակցություն է ստեղծում բուհերի միջև, որոնք ցանկանում են ավելի մրցունակ դառնալ։
