ԵՐԵՎԱՆ, 19 մայիսի — Sputnik. Քաղաքագետ Հայկ Մարտիրոսյանը չի կիսում Վիեննայի հանդիպումը որպես հաղթանակ կամ նվաճում դիտարկելու տեսակետը: Ավելին`նա վստահ չէ, որ Ադրբեջանը հետևողական է լինելու ձեռք բերված պայմանավորվածությունները, այդ թվում` զինադադարը պահպանելու հարցում:
«Ադրբեջանի պետական և ազգային գաղափարախոսությունը կառուցվել է ոչ միայն Արցախի, այլև Հայաստանի ոչնչացման վրա, և դրանից հրաժարվելու ճանապարհ Ադրբեջանն ինքն իրեն ուղղակի չի թողել, որովհետև դաստիարակել է մի սերունդ, որը հաճույքով գլխատում է հայ զինվորներին, այսինքն` կատարում է ռազմական հանցագործություններ, և Ադրբեջանի բարձրագույն ղեկավարությունը նրանց դրա համար պարգևատրում է»,- ասաց քաղաքագետը:
Անդրադառնալով հայկական տարածքների կորստի մասին նաև ՀՀ նախագահի հաստատած տեղեկություններին` Հայկ Մարտիրոսյանը կարծիք հայտնեց, որ ռազմավարական կամ մարտավարական նշանակություն չունեցող տարածքներ գոյություն չունեն:
«Պետությունների բոլոր տարածքները, անգամ` ծովային, յուրաքանչյուր մետր հող ունի ազգային արժեք: Այն չի պատկանում տվյալ պահին այդ հողի վրա ապրող մարդկանց, դա պատկանում է պետությանը, սերունդներին»,- ասաց քաղաքագետը` հավելելով, որ որոշ երկրներ այսօր օվկիանոսներում նոր տարածքներ են ստեղծում, քանի որ դրանք արժեք են:
Ադրբեջանի հետ ցանկացած բանակցություն Հայկ Մարտիրոսյանն անիմաստ է համարում, քանի որ կարծում է, որ այդ երկրի և ԻՊ-ի միակ տարբերությունն այն է, որ Ադրբեջանը միջազգայնորեն ճանաչված պետություն է և ՄԱԿ-ի անդամ:
