ՌԴ գլխավոր ստոմատոլոգ. հայկական ստոմատոլոգիան հուսալի ձեռքերում է

ԵՐԵՎԱՆ, 19 մայիսի-Sputnik. Երևանի Մխիթար Հերացու անվան պետական բժշկական համալսարանի նիստերի դահլիճում տեղի ունեցավ Ստոմատոլոգների առաջին հայ-սլավոնական միջազգային վեհաժողովի բացման արարողությունը։

Հայ-սլավոնական միջազգային վեհաժողովին մասնակցում են ներկայացուցիչներ աշխարհի տարբեր երկրներից, այդ թվում` Ռուսաստանից, Բելառուսից, Ուկրաինայից, Շվեյցարիայից։

ՌԴ մանկական գլխավոր ստոմատոլոգ Լյուդմիլա Մաքսիմովսկայան ընդգծեց, որ նման միջոցառման անցկացումը ռազմավարական քայլ է։

«Մենք ձեզ հետ քաղաքականության սահմաններից դուրս ենք։ Մենք ունենք միևնույն նպատակը` բուժում ենք մարդկանց։ Ես դահլիճում տեսնում եմ երիտասարդ բժիշկների և ուրախանում եմ այդ փաստով։ Տեսնում եմ, որ հայկական ստոմատոլոգիան հուսալի ձեռքերում է։ Հավատացեք, մենք հիանալի մասնագիտություն ունենք։ Ես` որպես ԱՆ գլխավոր մասնագետ, գիտեմ, որ մյուս մասնագետները մեզ նախանձում են»,-ասաց Լյուդմիլա Մաքսիմովսկայան։

Վեհաժողովի մյուս մասնակիցները մասնագիտական քննարկումներից զատ նշեցին, որ առաջին անգամ լինելով Հայաստանում` վառ տպավորություններ են ստացել։

Վեհաժողովի շրջանակում կազմակերպվեց նաև ստոմատոլոգիական նյութերի, գործիքների և սարքավորումների ցուցահանդես։ Վեհաժողովի շրջանակում` մայիսի 22-24-ը, գիտական սեմինար կկազմակերպվի նաև Արցախում։