ԵՐԵՎԱՆ, 19 մայիսի — Sputnik. Շուրջ 10 տարվա պայքարից հետո հունիսի 2-ին Գերմանիայի բունդեսթագում դարձյալ քվեարկության կդրվի Հայոց ցեղասպանության ճանաչման բանաձևը: Բանաձևի հեղինակներ` Գերմանիայի ձախ կուսակցության անդամ պատգամավորները մայիսի 19-ին Երևանում հայտարարեցին, որ այս անգամ բանաձևն, ամենայն հավանականությամբ, կընդունվի:
Հայոց ցեղասպանության ճանաչման մասին քննարկումներ բազմիս են եղել բունդեսթագում, սակայն այս տարի նման բանաձևի ընդունման հնարավորությունը շատ ավելի մեծ է, քանի որ Գերմանիայում թե´ հասարակական, թե´ քաղաքական շրջանակներում խիստ քննադատություններ են հնչում Գերմանիայի կանցլեր Անգելա Մերկելի վարած քաղաքականության և հատկապես Թուրքիայի նախագահի հետ ունեցած սերտ հարաբերությունների մասին: Երևանում լրագրողների հետ հանդիպմանը նման կարծիք հայտնեց Գերմանիայի ձախ կուսակցության անդամ, Հայոց ցեղասպանության ճանաչման բանաձևի հեղինակ և ջատագով Ուլլա Յելփքեն:
«Սա արդեն միայն կառավարության խնդիրը չէ, այլև հասարակության, որը Մերկելին մեղադրում է Էրդողանի հետ գործարքների մեջ: Եվ բունդեսթագում կան շատ պատգամավորներ, որոնք ուզում են ցույց տալ` մենք թույլ չենք տա, որ Էրդողանի պես բռնապետը փորձի ճնշում գործադրել մեզ վրա»,- ասաց պատգամավորը:
Ի դեպ, Ուլլա Յելփքեն պնդում է, որ բանաձևում պետք է ամրագրվի նաև Հայոց ցեղասպանության համար Գերմանիայի` որպես Օսմանյան Թուրքիայի դաշնակցի պատասխանատվության հարցը:
Գերմանացի մեկ այլ պատգամավոր` Մարդին Դոլցեն կարծում է, որ հունիսի 2-ին քվեարկության դրված բանաձևը կընդունվի փոքր-ինչ մեղմացված տարբերակով, բայց վստահեցնում է, որ իրենք շարունակելու են պայքարը` ոչ միայն Գերմանիայի պատասխանատվության, այլև Հայոց ցեղասպանության հարցն իրենց երկրի դպրոցական դասագրքերում ներառելու համար:
Ուշագրավ է, որ Գերմանիայի Համբուրգի շրջանից ազգությամբ թուրք պատգամավոր Հասան Բուրգուջօղլին համոզված է, որ ժամանակակից Թուրքիայի հասարակությունը դեռ շատ հեռու է ցեղասպանության համար պատասխանատվության գիտակցումից:
Sputnik Արմենիայի հիշեցմանը, որ այսօր աշխարհի աչքի առաջ Թուրքիայի խորհրդարանում հայ լինելու համար պատգամավորի են ծեծում, թուրք պատգամավորը նշեց. «Ֆաշիզմն այսօր ապրում է Թուրքիայում»։ Նա հավելեց, որ այսօր ամբողջ աշխարհը պետք է ձգտի տապալել Էրդողանին:
