ԵՐԵՎԱՆ, 19 մայսիի-Sputnik. «Նաիրիտի» համակարգող խմբի անդամներն իրենց բողոքի ձայնն են ուզում հասցնել ՀՀ գլխավոր դատախազ Գևորգ Կոստանյանին։ Նրանք ահազանգում են` բազմաթիվ ցույցերից հետո իրենց աշխատավարձերի վճարումները կատարվում են անընդունելի պայմաններում։
«Աշխատավարձերի վճարումները կատարվել են շանտաժի, մեզ համար ոչ ընդունելի պայմաններով։ Խնդրում և պահանջում ենք մեր այս դիմումն ընդունել որպես հայտարարություն, համարել հիմք քրեական գործ հարուցելու համար, նաև անվավեր ճանաչել ընկերության աշխատակիցների և «Նաիրիտ-2» ՓԲԸ-ի միջև կնքված պայմանագիրը»,- ասաց խմբի անդամներից մեկը։
Նրանց խոսքով՝ երկար բողոքներից ու ցույցերից հետո «Նաիրիտ 2»-ի և «Նաիրիտ» գործարանի ղեկավարության հայտարարությամբ առաջարկվել է աշխատավարձի պահանջի զիջման պայմանագիր կնքել «Նաիրիտ 2» ընկերության հետ։ Դրանով նախկին աշխատակիցները զիջում են աշխատավարձի և դրա նկատմամբ աշխատանքային օրենսգրքով հասանելիք բոլոր պահանջները «Նաիրիտ 2» ընկերությանը։ Ըստ դրա, եթե չկատարվի պահանջի զիջում, չեն ստանա աշխատավարձերը։ Նա, ով չի համաձայնել առաջարկին, չի ստացել դատարանի վճռով օրինական ուժի մեջ մտած գումարը։
ԽՍՀՄ-ի տարիներին «Նաիրիտը» քլորոպրենային կաուչուկի միակ արտադրողն էր տարածաշրջանում։ 2006թ.-ին «Նաիրիտի» բաժնետոմսերի 90 տոկոսը վաճառվեց Rhinoville Property կոնսորցիումին 40 մլն դոլարով, բաժնետոմսերի 10 տոկոսը պատկանում է Հայաստանի կառավարությանը։ 2010թ.-ի ապրիլից գործարանում արտադրությունը դադարեցվել է ֆինանսական խնդիրների պատճառով։
