ԵՐԵՎԱՆ, 4 մայիսի – Sputnik. Էկոնոմիկայի նախարար Արծվիկ Մինասյանն այսօր լրագրողների հետ զրույցում, անդրադառնալով «Նաիրիտ» գործարանի հնարավոր ճակատագրին, հայտարարեց, որ բոլոր ջանքերը գործադրելու է, «որ մենք ունենանք Նաիրիտ»:
Բայց մինչ նախարարը ջանքեր է գործադրում, գործարանի աշխատակիցները ծանուցագրեր են ստանում այն մասին, որ հուլիսի 1-ից ազատված են աշխատանքից։ Ըստ տարածված լուրերի`աշխատանքից ազատման մասին այս պահին արդեն տեղեկացվել է գործարանի 450 աշխատակից։
Էկոնոմիկայի նախարարն այսօր հրաժարվեց որևէ կերպ մեկնաբանել այս լուրերը` խորհուրդ տալով այդ հարցով դիմել դրանք տարածողներին։
«Ես ոչինչ չունեմ այդ թեմայով ասելու, որովհետև առնչություն չունեմ»,- ասաց նախարարը, ով, ի դեպ, դարձյալ ըստ ոչ պաշտոնական լուրերի, մինչ հերթական կրճատման մասին լուրերի տարածումը, այցելել էր «Նաիրիտ» գործարան։
ԽՍՀՄ-ի տարիներին «Նաիրիտը» քլորոպրենային կաուչուկի միակ արտադրողն էր տարածաշրջանում։ 2006թ.-ին «Նաիրիտի» բաժնետոմսերի 90 տոկոսը վաճառվեց Rhinoville Property կոնսորցիումին 40 մլն դոլարով, բաժնետոմսերի 10 տոկոսը պատկանում է Հայաստանի կառավարությանը։ 2010թ.-ի ապրիլից գործարանում արտադրությունը դադարեցվել է ֆինանսական խնդիրների պատճառով։
