ԵՐԵՎԱՆ, 18 մայիսի- Sputnik. 20-րդ դարից սկսած՝ տարածաշրջանում առաջացող հակամարտությունները հիմնականում ծագել են այն պատճառով, որ նախ թուլացել է Ռուսական կայսրությունը, իսկ հետո՝ Խորհրդային Միությունը, Երևան-Մոսկվա տեսակապի ժամանակ ասաց Հայաստանի պաշտպանության նախկին նախարար, գեներալ-լեյտենանտ Վաղարշակ Հարությունյանը:
«Այն, ինչ այսօր մենք տեսնում ենք, ԽՍՀՄ-ի փլուզման և ինչ-որ փուլում Ռուսաստանի ազդեցության նվազման արդյունք է: ԽՍՀՄ-ի փլուզմանը հաջորդեցին ինտեգրացիոն գործընթացները.1991թ.-ի դեկտեմբերին ստեղծվեց ԱՊՀ-ն, Անդրկովկասի երկրներն էլ ինտեգրացման գործընթաց սկսեցին տարբեր եվրոպական կառույցների հետ»,- ասաց Հարությունյանը:
Նրա խոսքով՝ այդ միտումները, որոնց մենք հետևում ենք արդեն 25 տարի, ոչ քաղաքական հակամարտությունների լուծման են հանգեցրել, ոչ էլ տարածաշրջանում տնտեսական խնդիրների հաղթահարման:
«Ռուսաստանի Դաշնությունը 1994թ.-ին հրադադար հաստատեց Մերձդնեստրում, Աբխազիայում, Օսիայում և Լեռնային Ղարաբաղում: Դա խոսում է մի բանի մասին՝ Ռուսաստանի սահմանների մոտ ծագած հակամարտությունները սպառնում են անվտանգությանը»,- նշեց ռազմական փորձագետը՝ ավելացնելով, որ Ռուսաստանը չի կարող նման հակամարտություններ թույլ տալ իր սահմանների մոտ:
«Տարածաշրջանի երկրները սկսում են ինտեգրվել տարբեր եվրոպական կառույցներին: Մյուս կողմից, 1992թ.-ին Հայաստանը ստորագրում է հավաքական անվտանգության, ՌԴ-ի հետ սահմանների համատեղ պաշտպանության մասին պայմանագիրը, 1994թ.-ին Հայաստանն ընդգրկվում է ՀՕՊ միացյալ համակարգում, իսկ 1995թ.-ին՝ ստորագրում Հայաստանի տարածքում ռուսական ռազմակայանի մասին համաձայնագիրը»,- նշեց Հարությունյանը:
Նրա խոսքով՝ կարելի է փաստել, որ Հայաստանը 1992թ.-ից ՀԱՊԿ, ԱՊՀ և այլ կառույցների շրջանակում ՌԴ-ի հետ ինտեգրացման ուղի է բռնել: Իսկ ինչ վերաբերում է Վրաստանին և Ադրբեջանին, ապա այդ երկրները մշակել են իրենց արտաքին քաղաքականությունը և ընտրել են սեփական մոտեցումները:
«Այսինքն մենք տեսնում ենք, որ տարածաշրջանում որոշ երկրներ գնացել են Եվրոպայի ուղղությամբ, իսկ Հայաստանը՝ Ռուսաստանի»,- ասաց նախկին նախարարը:
«Վերելք» վերլուծական կենտրոնի գլխավոր խմբագիր Արշալույս Մղդեսյանն իր հերթին նշեց, որ չի կարելի հենց այնպես խոսել այս կամ այն ինտեգրացիայի մասին:
«Պետք է ավելի սերտ աշխատել կոնկրետ երկրի հասարակության հետ: Ինտեգրացիան ոչ միայն քաղաքական որոշում է, դա նաև հասարակության և քաղաքացիների աջակցությունն է՝ հաշվի առնելով առանձնահատկությունները: Առանց այդ աջակցության ոչինչ չի ստացվի»,- ասաց Մղդեսյանը:
Նա նշեց, որ այսօր Հայաստանում բարեփոխումներ են կատարվում, և եվրասիական ինտեգրացիան այդ առումով կարող է օգնել:
Միաժամանակ, անդրադառնալով Վրաստանի հնարավոր անդամակցությանը ԵՏՄ-ին, փորձագետ Ջոնի Մելիքյանը նշեց, որ այդ համագործակցությունը չի բացառվում:
«Վրաստանը լավ փոխհարաբերությունների մեջ է ԵՏՄ երկրների՝ Հայաստանի, Բելառուսի և Ղազախստանի հետ: Այսօրվա դրությամբ գոյություն ունեն նաև գործնական առևտրային հարաբերություններ Մոսկվայի հետ, ինչպես նաև բանակցություններ են ընթանում տարբեր մակարդակներում»,- ասաց նա:
Եվրասիական տնտեսական միությունը տարածաշրջանային տնտեսական ինտեգրման միջազգային կազմակերպություն է։ Անդամ պետություններն են Հայաստանը, Բելառուսը, Ղազախստանը, Ղրղըզստանը և Ռուսաստանը: ԵՏՄ-ն ստեղծվել է ազգային տնտեսությունների բազմակողմանի արդիականացման, կոոպերացիայի, մրցունակության բարձրացման և անդամ պետությունների բնակչության կենսամակարդակի բարձրացման համար կայուն պայմաններ ստեղծելու նպատակով:
