ԵՐԵՎԱՆ, 18 մայիսի- Sputnik. Անդրկովկասի տարածաշրջանում տիրող իրավիճակը բավականաչափ անհանգիստ է, և բոլոր հանգամանքներն էլ պարզ են, սակայն փորձագիտական և այլ հարթակներում ակտիվ քննարկվում է եվրասիական ինտեգրացման հեռանկարն Անդրկովկասում: Այս մասին Sputnik Արմենիա մամուլի կենտրոնում կազմակերպված Երևան-Մոսկվա տեսակապի ժամանակ ասաց Նորագույն պետությունների միջազգային ինստիտուտի տնօրեն Ալեքսեյ Մարտինովը:
«Ինչ վերաբերում է այսօրվա կլոր սեղանի ձևաչափին, ապա Հայաստանն առայժմ ԵՏՄ միակ լիիրավ և լիարժեք անդամն է: Հայաստանն առաջինը բռնեց այդ տրամաբանական և անայլընտրանքային ուղին»,- նշեց Մարտինովը:
Փորձագետի խոսքով՝ ինչպես նախկինում, այնպես էլ այսօր քննարկվում է այն հարցը, որ Հայաստանից հետո ԵՏՄ-ին կմիանա նաև Վրաստանը:
«Հնարավոր է՝ դա այդքան էլ իրատեսական չի հնչում, ինչպես կցանկանար Վրաստանի քաղաքացիների ճնշող մեծամասնությունը, որն ապրել է մեծ խորհրդային երկրի ձևաչափում, երբ ամեն ինչ բոլորի մոտ լավ է եղել»,- ասաց Մարտինովը:
Նրա խոսքով՝ «մենք շատ լավ տեսանք, թե ինչ ավարտ ունեցան Անդրկովկասի երկրներին այլ ինտեգրացիոն գործընթացների մեջ միավորելու փորձերը»:
«Օրինակ՝ եվրոպական ասոցիացիան: Բայց դա չի աշխատում և չի հանգեցնում Անդրկովկասի զարգացմանը: Նման նախագծերը բերում են նրան, որ տարածաշրջանի ժողովուրդների միջև բաժանարար գծերն ավելի են կոշտանում»,- ասաց փորձագետը:
Մարտինովը չբացառեց նաև, որ Ադրբեջանը նույնպես կարող է միանալ եվրասիական ինտերգրացմանը:
«Մենք զգույշ ենք խոսում, բայց խոսում ենք այն մասին, որ հեռանկարում Ադրբեջանն այս կամ այն կերպ կասոցացվի եվրոպական ինտեգրացիայի հետ: Դա թե՛ աշխարհագրություն է, թե՛ աստիճանավորում, թե՛ անվտանգության ապահովման տրամաբանություն»,- ասաց Մարտինովը:
Եվրասիական տնտեսական միությունը տարածաշրջանային տնտեսական ինտեգրման միջազգային կազմակերպություն է։ Անդամ պետություններն են Հայաստանը, Բելառուսը, Ղազախստանը, Ղրղըզստանը և Ռուսաստանը: ԵՏՄ-ն ստեղծվել է ազգային տնտեսությունների բազմակողմանի արդիականացման, կոոպերացիայի, մրցունակության բարձրացման և անդամ պետությունների բնակչության կենսամակարդակի բարձրացման համար կայուն պայմաններ ստեղծելու նպատակով:
