ԵՐԵՎԱՆ, 17 մայիսի-Sputnik. Գոհար Սարգսյան. ՖԻԴԵ-ի նախագահ Կիրսան Իլյումժինովը Հայաստանի ու Ադրբեջանի միջև շախմատային պարտիա անցկացնելու առաջարկի մասին առաջինը հայտնել է ՀՀ նախագահ Սերժ Սարգսյանին։ Նրա խոսքով` նախագահ Սարգսյանը սիրով ընդունել է այդ առաջարկը։
«Մայիսի 24-ին ես կայցելեմ Ադրբեջան ու նույնը կասեմ նաև ադրբեջանական կողմին։ Մենք ունենք «կոլեկտիվ շախմատ» հասկացությունը, երբ մի ամբողջ երկիր խաղում է մյուսի դեմ։ Կարելի է շախմատային քայլ ուղարկել ինտերնետով, հեռախոսի կամ համակարգչի միջոցով»,- ասաց Կիրսան Իլյումժինովը։
Sputnik Արմենիայի այն հարցին, թե արդյո՞ք շախմատն ունակ է խաղաղություն սփռել հակամարտող կողմերի միջև, Կիրսան Իլյումժինովը պատասխանեց` բոլոր հարցերը պետք է լուծվեն շախմատի սեղանի շուրջ, իսկ պատերազմներն ընթանան միայն շախմատի խաղատախտակի վրա։
«ՖԻԴԵ-ն դեմ է ռազմական հակամարտությանը։ Շախմատը և առհասարակ սպորտը միշտ ծառայել են խաղաղության հաստատմանը»,-ասաց ՖԻԴԵ-ի նախագահը։
«Շախմատի աշխարհի օլիմպիադայի ժամանակ մասնակից երկրների շախմատիստներն օրինակ կծառայեն, որ պետք է ապրել խաղաղության մեջ»,-ասաց նա։
Կիրսան Իլյումժինովը Շենգավիթի աշխմատի դպրոցի բացման ժամանակ այսօր բլից պարտիա խաղաց ՀՀ նախագահ Սերժ Սարգսյանի հետ։ Այն ավարտվել է ոչ-ոքի։ Sputnik-ի հետ զրույցում նա հաստատեց, որ Սերժ Սարգսյանն ուժեղ շախմատիստ է և խորապես տիրապետում է տեսությանը։
«Սերժ Սարգսյանը չեմպիոն է այն երկրների նախագահների շրջանում, որոնք մտնում են ՖԻԴԵ-ի կազմի մեջ, իսկ այդ երկրները 187-ն են»,-ասաց նա։
ՖԻԴԵ-ի նախագահը հայտնեց նաև, որ տանտիրոջ հյուրընկալությամբ` Սերժ Սարգսյանն առաջարկել էր, որ Իլյումժինովը խաղա սպիտակ խաղաքարերով։
