Նորաբաց դպրոցն ունի ավելի քան 200 սան, սակայն կարող է ընդունել ավելի շատ շախմատասեր պատանիների։ Նախնական կանխատեսումներով` մինչև սեպտեմբեր սաների թիվը կհասնի 400-ի։ Շախմատը հասարակության մի ստվար զանգվածի համար դարձել է նաև ապրելակերպ։
Շենգավիթի շախմատի դպրոցի փոխտնօրեն Գագիկ Սարգսյանը լրագրողների հետ զրույցում վստահեցրեց, որ իրենք լուրջ մարտահրավեր են նետելու համակարգչային շախմատին։ Իսկ ռոմանտիկ շախմատն, ըստ նրա, այն է, ինչը ցուցադրում էր հանճարեղ Տիգրան Պետրոսյանը։ Նրա խոսքով` շախմատը զարգացնում է անալիտիկ մտածելակերպը։
Այնուհետև ՀՀ նախագահ Սերժ Սարգսյանը ներկա գտնվեց Խուլերի շախմատի աշխարհի անհատական առաջնության բացման արարողությանը։ Այն տեղի ունեցավ Տիգրան Պետրոսյանի անվան շախմատի տանը։ Առաջնության բացմանը ներկա էր նաև ՖԻԴԵ-ի նախագահ Կիրսան Իլյումժինովը։ ՀՀ նախագահի աշխատակազմի հասարակայնության հետ կապերի վարչությունից տեղեկացրին, որ Սարգսյանն ու Կիրսան Իլյումժինովը ծաղիկներ են դրել Տիգրան Պետրոսյանի կիսանդրու մոտ և հարգանքի տուրք մատուցել նրա հիշատակին։
Առաջնության մեկնարկը տրվեց նախագահ Սարգսյանի անմիջական մասնակցությամբ. նա արեց առաջին քայլը` բարեհաջող ընթացք մաղթելով առաջնությանը։
ՖԻԴԵ-ի նախագահը Երևանն անվանեց շախմատի զարգացման մայրաքաղաք։ Նա ընդգծեց, որ ՖԻԴԵ-ն միակն է միջազգային սպորտային ֆեդերացիաներից, որ անցկացնում է համաշխարհային օլիմպիադա, որտեղ առողջ մարզիկների կողքին ուժերն են չափում նաև սահմանափակ հնարավորությունների տեր մարդիկ։
Մրցաշարը տևելու է մինչև մայիսի 26-ը, տեղի է ունենալու 7 ենթախմբում` 24 երկրից շուրջ 120 շախմատիստի մասնակցությամբ։
