ԵՐԵՎԱՆ, 12 մայիսի- Sputnik. ԵԱՀԿ Մինսկի խմբի համանախագահների տարածած հայտարարության տեքստը նման է Հայաստանի նախագահ Սերժ Սարգսյանի հայտարարությանը, լրագրողներին ասաց Հայաստանի ԱԺ փոխխոսնակ, ՀՀԿ մամուլի քարտուղար Էդուարդ Շարմազանովը։
ԵԱՀԿ Մինսկի խմբի համանախագահներ` ՌԴ դեսպան Իգոր Պոպովը, ԱՄՆ դեսպան Ջեյմս Ուորլիքը և Ֆրանսիայի դեսպան Պիեռ Անդրիեն հինգշաբթի կոչ են արել Հայաստանի և Ադրբեջանի նախագահներին անհապաղ հանդիպել` Լեռնային Ղարաբաղում իրավիճակը քննարկելու համար և պատրաստակամություն են հայտնել այն անցկացնել Վիեննայում հաջորդ շաբաթ։
«Հայտարարությունում օգտագործված տերմինաբանությունը հիշեցնում է ՀՀ նախագահի հայտարարությունը, մասնավորապես, վստահության մեխանիզմների, հրադադարի պահպանման հարցում։ Այսօր չի դրվում պայմանավորվածությունների նոր փաթեթի հարցը, խոսքն այն մասին է, ինչի մասին խոսել է Սերժ Սարգսյանը»,- ասաց Շարմազանովը։
Ավելի վաղ Հայաստանի նախագահ Սերժ Սարգսյանը հայտարարել էր, որ Ղարաբաղի շուրջ բանակցությունների վերսկսման համար պայմանների թվում են` վստահության միջոցների ձևավորումը և միջադեպերի հետաքննության մեխանիզմների ներմուծումը, միջազգային հանրության հասցեական հայտարարությունը և այն բանի երաշխիքները, որ Ադրբեջանը չի գնա նոր ագրեսիայի և ահաբեկչության ԼՂ ժողովրդի դեմ։
Նրա խոսքով` նախագահի աշխատակազմից սահմանված ժամկետում կպատասխանեն Վիեննայում հանդիպման մասին ԵԱՀԿ ՄԽ հրավերին։
