ԵՐԵՎԱՆ, 12 մայիսի-Sputnik. Մոսկվայում հաստատում են Վիեննայում մայիսի 16-ին Հայաստանի և Ադրբեջանի նախագահների հանդիպման հնարավորությունը, որին կարող են մասնակցել Ռուսաստանի, ԱՄՆ-ի, Ֆրանսիայի ԱԳՆ ղեկավարները, ՌԻԱ Նովոստիին հայտնել է դիվանագիտական աղբյուրը։
«Այո, Մոսկվայում հաստատում են նման հանդիպման հնարավորությունը։ Այն պատրաստվում է երկու երկրների նախագահների և Ռուսաստանի, ԱՄՆ-ի, Ֆրանսիայի, արտգործնախարարների մասնակցությամբ»,- ասել է գործակալության զրուցակիցն` ի պատասխան Վիեննայում մայիսի 16-ին նման հանդիպում անցկացնելու մասին հարցին։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
