ԵՐԵՎԱՆ, 12 մայիսի — Sputnik. ԵԱՀԿ ՄԽ-ի համանախագահները` ՌԴ դեսպան Իգոր Պոպովը, ԱՄՆ դեսպան Ջեյմս Ուորլիքն ու Ֆրանսիայի դեսպան Պիեր Անդրիեն, կոչ են արել Հայաստանի և Ադրբեջանի նախագահներին անհապաղ հանդիպել Լեռնային Ղարաբաղի հակամարտության շուրջ տիրող իրավիճակը քննարկելու համար։ Նրանք նշել են, որ պատրաստ են այդ հանդիպումն անցկացնել հաջորդ շաբաթ Վիեննայում, գրված է կազմակերպության կայքում։
«Բռնությունների վերջին ալիքի ներքո և իրավիճակի անհապաղ թուլացնելու անհրաժեշտությունից ելնելով`մենք կարծում ենք` ժամանակն է, որ Հայաստանի ու Ադրբեջանի նախագահները հանդիպեն», — նշված է հաղորդագրության մեջ։
Հայտարարության համաձայն` ԵԱՀԿ ՄԽ համանախագահ երկրների արտգործնախարարները պատրաստ են աջակցել այդ հանդիպմանը։ Բանակցությունների հիմնական թեման պետք է լինի հրադադարի ռեժիմի պահպանումը և վստահելի հարաբերություններ ձեռք բերելու ուղիները, որոնք կարող են հիմք դառնալ այս հարցի հետագա քննարկումների համար։
«Բանակցություններում չի կարող հաջողություն արձանագրվել, եթե բռնությունը շարունակվում է, առանց բանակցային գործընթացի հնարավոր չէ հասնել խաղաղության»,- նշել են համանախագահները։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին պայմանավորվածություն է ձեռք բերվել ռազմական գործողությունները դադարեցնելու մասին, սակայն երկու կողմն էլ հայտարարում է, որ փոխադարձ պայմանավորվածությունը խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
