ԵՐԵՎԱՆ, 10 մայիսի- Sputnik. Պանամական Mossack Fonseca ընկերության փաստաթղթերում նշված Հայաստանի քաղաքացիների ազգանուններն ուսումնասիրվում են համապատասխան մարմինների կողմից, ասաց Հայաստանի հանրապետական կուսակցության խմբակցության ղեկավար Վահրամ Բաղդասարյանը։
«Պետք չէ շտապել։ Այդ ամենն ուսումնասիրվում է համապատասխան մարմինների կողմից։ Դուք տեսնում եք, որ արձագանքներ կան»,- ասաց Բաղդասարյանը` նկատի ունենալով ԴԱՀԿ նախկին ղեկավար Միհրան Պողոսյանի հրաժարականը։
Մեկնաբանելով հրապարակված ցուցակում բնապահպանության նախկին նախարարի անվան առկայությունը` պատգամավորը նշեց, որ փաստաթղթերում շատ ազգանուններ կարող են լինել, բայց պետք է հավաստիանալ, որ դրանք ճիշտ են։
Գերմանական Sueddeutsche Zeitung-ն ապրիլի սկզբին հրապարակել էր պանամական Mossack Fonseca իրավաբանական ֆիրմայի փաստաթղթերը, որոնք, ինչպես պնդում է թերթը, վկայում են օֆշորային սխեմաներում համաշխարհային առաջնորդների և նրանց համախոհների առկայության մասին։
Մայիսի 9-ին ցուցակը հասանելի է դարձել լայն հասարակությանը։ Փաստաթղթերում նշված է Հայաստանի 26 քաղաքացու անուն։
