ԵՐԵՎԱՆ, 10 մայիսի — Sputnik. Օֆշորներն ունեն մեկ նպատակ` թաքցնել փողերը։ Այսօր լրագրողների հետ հանդիպմանը, մեկնաբանելով Հայաստանում հասունացող նոր օֆշորային սկանդալը, նշեց տնտեսագետ Վարդան Բոստանջյանը։
Վարդան Բոստանջյանը նշեց, որ գումարը օֆշորային գոտի տեղափոխողները հիմնականում նպատակ ունեն տվյալ երկրից կապիտալի արտահոսք կազմակերպել և մեկ այլ երկրում դրանց անվտանգ հանգրվան ապահովել, ինչն իր հերթին բացասաբար է ազդում տվյալ երկրի ֆինանսական շուկայի ու ընդհանրապես`տնտեսության վրա։
«Օֆշորային գոտում գտնվելն արդեն նշանակում է, որ դու չես տարել փոքր ծավալի միջոցներ»,- ասաց Վարդան Բոստանջյանը` հավելելով. «Եթե այդ միջոցները մնային հանրապետության տարածքում, երկրի ներսում շրջանառվեին ու օգտագործվեին, ապա կբերեին նոր հարստություն, նոր բարձունքներ»։
Իսկ որ պանամական օֆշորներում գումար թաքցրած 37 նոր մարդու անուն է հայտնվել, Բոստանջյանի համոզմամբ, կարող է նշանակել միայն մեկ բան` Հայաստանում ֆինանսական խոշոր հոսքերի ու փոխանցումների նկատմամբ պատշաճ վերահսկողություն չկա։
«Մեզանում վերահսկողությունը, լծակները, մոտեցումները, որոնք հարիր են արդյունավետ երկրներին, չեն եղել, որի պարագայում առանձին սուբյեկտներ, անձինք կարողացել են հանրապետությունից դուրս տանել ինչ-որ միջոցներ»,- ասաց տնտեսագետը։
Հիշեցնենք, որ Հետաքննող լրագրողների միջազգային կոնսորցիումը (ICIJ) հրապարակել է փաստաթղթերի փաթեթ, որում բացահայտել է օֆշորային սխեմաներում ներգրավված 214 000 ֆիզիկական և իրավաբանական անձանց ցանկ։ Այնտեղ կա 37 հայկական ազգանուն։
Նշենք, որ վերջինն իր հրաժարականը մեկնաբանել էր հատկապես այն հանգամանքով, որ իր անունն օֆշորային փաստաթղթերում հայտնվել էր Ադրբեջանի նախագահ Ալիևի անվան կողքին։
Միհրան Պողոսյանի պաշտոնանկությունից հետո պանամական օֆշորային գործարքների հետ կապված նյութերի հիման վրա ՀՀ հատուկ քննչական ծառայությունում քրեական գործ էր հարուցվել, որի նախաքննությունը դեռ շարունակվում է։
