ԵՐԵՎԱՆ, 10 մայիսի — Sputnik. Հայաստանի պարտավորությունների կատարման մշտադիտարկման հարցով ԵԽԽՎ համազեկուցողներ Ալան Միլը (Մեծ Բրիտանիա, Սոցիալիստների խումբ) եւ Ջուզեպպե Գալատին (Իտալիա, ԵԺԿ) մայիսի 11-12-ը կլինեն Հայաստանում՝ իրենց ուշադրությունը կենտրոնացնելով սահմանադրական փոփոխությունների, ընտրական համակարգի բարեփոխումների և կոռուպցիայի դեմ պայքարի մշտադիտարկմանը:
Երևանում նրանք կհանդիպեն նախագահի, վարչապետի, արդարադատության նախարարի եւ գլխավոր դատախազի հետ, ինչպես նաեւ էթիկայի հանձնաժողովի ղեկավարի և կառավարության աշխատակազմի ղեկավարի հետ, ասված է ԵԽԽՎ հայտարարության մեջ:
Հանդիպումներ կլինեն նաև խորհրդարանական խմբակցությունների ներկայացուցիչների և ԵԽԽՎ-ում հայկական պատվիրակության անդամների, ինչպես նաև քաղաքացիական հասարակության ներկայացուցիչների հետ:
