ԵՐԵՎԱՆ, 9 մայիսի — Sputnik. Ամենայն Հայոց Գարեգին Բ կաթողիկոսը շնորհավորական ուղերձ է հղել Շուշիի ազատագրության և Հաղթանակի ու խաղաղության տոնի առիթով, հայտնում է Մայր Աթոռ Սուրբ Էջմիածնի տեղեկատվական համակարգը։
Կաթողիկոսը նշել է, որ ազգերի ու պետությունների հետ հայ ժողովուրդը տոնում է պատմական հաղթանակը ֆաշիզմի ու բռնության դեմ պայքարում, որին մասնակցություն բերեցին հայ ժողովրդի բազմահազար զավակներ` հայազգի փառապանծ զորավարներ ու զինվորներ:
«Տոնում ենք Շուշիի ազատագրումը և հաղթանակը Արցախյան ազատամարտում, որով պաշտպանեցինք մեր ժողովրդի ազատ, արժանապատիվ կյանքի արդար իրավունքը»,- նշված է կաթողիկոսի ուղերձում։
Մայիսի 9-ի հաղթական խորհուրդն առանձնակի զգացումներով է լցնում հայ մարդկանց հոգիները, նշել է Գարեգին Բ-ն, քանզի հայրենանվիրումի նույն ջերմ ոգով հայ ժողովրդի զավակները ապրիլյան օրերին իրենց սխրանքներով դիմակայեցին Ադրբեջանի սանձազերծած ռազմական գործողություններին` անառիկ պահելով սահմանները:
